Kryeministri Rama sqaron pozicionin e Shqipërisë në përplasjen midis SHBA-ve dhe Iranit: “Nuk jemi të rrezikuar”
Kryeministri Edi Rama ndodhet në Vjenë ku pa nga afër zyrat qendrore të OSBE-së dhe u njoh me stafin shqiptar në këtë vit të rëndësishëm që për herë të parë, Shqipëria merr zyrtarisht nesër Presidencën e OSBE dhe do ta drejtojë atë përgjatë vitit 2020. Shefi i ekzekutivit i është përgjigur edhe pyetjeve të gazetarëve rreth sfidave dhe axhendës që e pret vendin tonë në këtë përgjegjësi që i është besuar.
Përsa i përket objektivave që Shqipëria do të ndjekë përgjatë presidencës së OSBE-së, sipas Ramës objektivat kryesore do të jenë tre:
“Vizioni ynë për kryesinë shqiptare të OSBE-së për vitin 2020 udhëhiqet nga tre objektiva të rëndësishme, përqendrimi në baza duke zbatuar së bashku dhe me mirëbesim, tërësinë e angazhimeve tona politike, ndryshime në terren, qoftë këto në parandalimin e përshkallëzimit të një konflikti, monitorimit të zgjedhjeve ose mbështetjen e reformave, apo përmirësimit të sigurisë dhe prosperitetit të qytetarëve tanë dhe duke vazhduar forcimin e dialogut të frymëzuar nga 30-vjetori i Marrëveshjes së Parisit”, – tha Rama.
Më tej kryeminsitri është ndalur gjatë në temën e konfliktit midis SHBA-së dhe Iranit dhe ekspozimit që Shqipëria ka në këtë përplasje, pas strehimit të një grupi opozitar iranian në vendin tonë, të cilët janë kundër regjimit në atdheun e tyre dhe janë dëbuar prej andej. Sipas tij, Shqipëria këtë nismë e ka në aleancë të plotë me SHBA-në dhe se strehimi i muxhahedinëve është sipas tij një mision humanitar dhe jo politik:
“Kjo është një temë dhe është një çështje që nuk është e re për ne, në raport me Iranin. Ne kemi ndërmarrë një veprim që i bën nder Shqipërisë që është në vazhdën traditës shqiptare, që është në vazhdën e një aleance strategjike të padiskutueshme me Shtetet e Bashkuara, për të mikpritur apo për t’i hapur dyert një grupi njerëzish që janë në rrezik për jetën. E siç shkruhet dhe në marrëveshjen që ne kemi bërë, ata në Shqipëri janë si rezultat i një operacioni humanitar, jo politik, humanitar. Ndërkohë që patjetër, ne kemi jetuar në diktaturë, po flisnim pak më përpara dhe ne e dimë shumë mirë si veprojnë diktaturat, si veprojnë regjimet totalitare e sa janë të obseduar për të kontrolluar gjithçka e për të mbytur çdo zë kundra dhe për të asgjësuar mundësisht çdo kundërshtar në gjithë globin.
Megjithatë, unë nuk besoj që kjo e ekspozon në mënyrë të posaçme Shqipërinë dhe nuk kemi arsye të besojmë këtë, pikërisht sepse ne jemi në kontakt permanent me aleatët tanë dhe kur është puna tek inteligjenca, besoj që ata janë të pa konkurrueshëm botërisht dhe si të thuash, në këtë rast, ne jemi në duar të sigurta kur është fjala tek marrja e informacionit dhe nuk kemi arsye objektive të besojmë që ka një ekspozim të veçantë, por nga ana tjetër sigurisht që jemi të angazhuar dhe jemi si të thuash, të angazhuar në përditshmëri për këtë proces, patjetër”.
Kryeministri Edi Rama ka deklaruar se shumë shpejt do të zhvillojë vizita në Ukrainë, Rusi dhe SHBA si pjesë e detyrimeve të drejtuesit të OSBE-së.
Geri Kolgega / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.