Kryeministrja e Moldavisë kërkon ndihmën e BE për krizën politike në vend
Kryeministrja e Moldavisë ka thënë për Euronews se ajo dëshiron që Bashkimi Europian të ndihmojë në shpëtimin e demokracisë së vendit të saj, në mesin e një krizë kushtetuese, pasi dy qeveri rivale akuzojnë njëra-tjetrën për uzurpimin e pushtetit. “Është e ardhmja e vendit që është në rrezik, është demokracia e kombit tonë, është rruga europiane e vendit, nëse dëshiron, sepse nëse ky regjim qëndron në pushtet, atëherë Moldavia do të humbasë”, tha Maia Sandu në një intervistë për Euronews.
Pas disa muajsh bisedimesh, socialistët pro-rusë dhe tregtarët e lirë pro-europianë bashkuan forcat dhe formuan një koalicion alternativ me një qëllim të qartë: të zhvendosnin partinë qeverisëse të oligarkut Vladimir Plahotniç dhe të shpëtojnë vendin nga korrupsioni. Por Gjykata Kushtetuese i bllokoi këto plane të dielën duke emëruar kryeministrin Pavel Filip si president të përkohshëm. Filip menjëherë bëri thirrje për një zgjedhje të parakohshme në shtator, ndërsa mijëra mbështetës të partisë së tij Demokratike u mblodhën në kryeqytetin Chisinau.
“Vendimet e gjykatës kushtetuese janë të paligjshme”, tha Sandu për Euronews, duke shtuar se qeveria e saj i kishte kërkuar Komisionit Europian dhe Këshillit të Europës që t’i shqyrtonin ato. Veçanërisht, si BE dhe Rusia kanë shprehur mbështetjen e tyre për një qeveri të re të kryesuar nga Sandu, një ish-ekzekutive i Bankës Botërore dhe ministre e arsimit.
“Objektivi i përbashkët është të heqim qafe regjimin oligarkik, e kemi diskutuar shumë qartë, se kemi një orientim pro-europian. Partia Socialiste ka orientim të ndryshëm, por kemi rënë dakord që marrëveshja jonë e asocimit të jetë baza e punës së qeverisë së tanishme, për sa kohë do të mbështetet kjo qeveri, do të duhet të shohim, por ia vlen të rrezikohet, sepse vendi duhet të heqë qafe regjimin “, u shpreh ajo.
Burimi: Euronews
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.