Kryeminstri në Llogora me qeverinë e re: Asnjë rritje taksash
Ne mandatin e dytë qeverisës nuk do të këtë rritje taksash. Ky është lajmi i dytë i mirë për biznesin e turizmit pas krijimit të një dikasteri të posaçëm për sipërmarrjen.
Deklarata u bë nga Kryeministri Edi Rama, gjatë një mëngjesi pune më gazetarët, ku aktualisht gjendet i gjithë kabineti i ri qeverisës.
Krahas reformave që pritet të ndërmerren në këtë mandate kryeministri premtoi thjeshtim të procedurave për dokumentacionin si dhe ulje të numrit të të punësuarve në administratën publike.
“Nga numri i punonjësve, e kemi më të ulëtin në rajon, punonjës shteti që punojnë në administratë dhe paguhen nga taksat. Nga numri i drejtorëve kemi numrin më të lartë, sepse janë të krijuar thjesht për të bërë qoka”.
Do forcojmë zhvillimin nëpërmjet rajoneve, tha Rama, ndërkohë që do ketë një rritje të bashkëpunimit me njësitë e qeverisjes vendore.
“Mendoj që ende numri i bashkive është i lartë, mund të jetë më i ulët për të pasur njësi ekonomike më të mëdha dhe për të pasur qeverisje më eficente. Ata besojnë ndryshe, ndërkohë që ka një pikë ku ata kanë të drejtë që niveli i shërbimeve në njësitë administrative ka rënë. Nuk mendoj që ka qenë më i mirë në kohën e komunave. Por kjo do të jetë pjesë e projekti, ne do të punojmë me bashkitë, që njësitë administrative të jenë të mirëfillta për të dhënë shërbime, edhe për të përdorur shumë më tepër teknologjinë. Një nga gjërat që kemi dakordësuar dje është që të gjithë ministrat do të fillojnë menjëherë punën me një grup ekspertësh dhe deri në fund të këtij viti do të vijnë me propozim për të pasur numrin më të ulët të dokumenteve që një ministri lëshon për qytetarët”.
Ndërsa lidhur me marrëdhënien e re që do të ketë më Presidentin Meta, Rama tha se ajo do të jetë institucionale.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.