Kryeprokurorja e Tiranës, reagon ashpër Yuri Kim – Ambasadorja: Po shpifet për ONM, mediat ta pasqyrojnë me integritet jo të heshtin

Debateve që ka shkaktuar kërkesa e ONM-së për shkarkimin nga detyra të kryeprokurores së Tiranës, Elisabeta Imeraj në shkallën e dytë të Vetting-ut I është bashkuar edhe Ambasadorja Amerikane në Tiranë.  Përmes një postimi në Twitter, Kim është pozicionuar kundër zërave që e vunë nën akuzë kërkesën e ONM-së për rivlerësimin e Prokurores në të trija kriteret në Apelin e Vetting-ut, pavarësisht se ajo ka kaluar me sukses shkallën e parë.  Ambasadorja pozicionohet fort kundër përpjekjeve të vazhdueshme për të sulmuar procesin e Vetting edhe duke shpifur kundër anëtarëve të ONM, ndërkohë që u bën thirrje mediave ta pasqyrojnë rastin me integritet, pa qëndruar të heshtur e të verbër.

Në përputhje me rolin e saj kushtetues në procesin e verifikimit, vëzhguesit ndërkombëtarë të ONM dje rekomanduan Komisionerët Publikë të apelojnë vendimin e Komisionit të Pavarur të Kualifikimit për një çështje të rëndësishme, shkruan Ambasadorja Amerikane.

Të gjithë duhet të shikojmë nga afër se çfarë do të ndodhë më pas. A do të jetë përgjigjja për të treguar guxim dhe integritet për të dhënë drejtësi apo, siç e kemi parë shumë shpesh në të kaluarën, do të ketë përpjekje për të devijuar duke sulmuar procesin e vettingut dhe duke shpifur për vëzhguesit ndërkombëtarë?

A do t’i shërbejnë mediat publikut dhe ta mbulojnë këtë çështje me integritet, apo do të marrin telefonata dhe do të bien dakord të qëndrojnë të heshtur dhe të verbër? Koha është tani për të treguar guxim dhe integritet. Koha për të thyer modelet e vjetra që dëmtojnë. Koha që Shqipëria të ecë përpara hap pas hapi. SHBA do të jetë me ty”, thekson Yuri Kim.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.