Kryetari i Rezervës Federale: “Ekonomia amerikane, në pozitë të fortë. Koronavirusi do të sjellë efekte”

Kryetari i Rezervës Federale,  Jerome Powell, tha gjatë dëshmisë në Kongres se ekonomia amerikane ndodhet në pozicion të fortë, pavarësisht kërcënimeve nga koronavirusi në Kinë dhe perspektivës së dobët afat-gjatë të ekonomisë botërore.   Ndërkohë që rreziqet si lufta tregtare janë larguar, Powell i tha Komisionit të Shërbimeve Financiare në Kongres se ekonomia amerikane po performon mirë. Rritja ekonomike në SHBA, që ndodhet tashmë në vitin e 11,  është më e gjata në historik.   Ai përsëriti këndvështrimin e bankës se segmenti aktual i normave të interesit  në 1.5-1.75% është i përshtatshëm për të ruajtur rritjen ekonomike.   Megjithatë ai tha se përhapja e koronavirusit do të ndikojë Kinën dhe partnerët tregtare, ç’ka do të japë efekte edhe tek ekonomia e Shteteve të Bashkuara.

“Pyetja për ne është, a do të ketë efekte tek ekonomia amerikane? A do të jenë materiale? Unë mendoj se do të ketë efekte në Kinë në gjysmën e parë të vitit,  tek vendet fqinje të kinës si dhe tek partnerët kryesorë tregtarë në Europë dhe Azi.  Për rrjedhojë, do të ketë efekte edhe tek Shtetet e Bashkuara.” – u shpreh ai.

Komentet e kryetarit të sistemit bankar qendror sollën reagim të heshtur nga Wall Street. Indeksi kryesor i titujve të kapitalit S&P 500 u rrit lehtë, ndërsa interesat e titujve të thesarit nuk ndryshuan.   Presidenti Donald Trump tha se Jerome Powell pengoi rritjen e aksioneve gjatë dëshmisë në Kongres.  “Kur ai nisi dëshminë, Dow Jones ndodhej në rritje me 125 pikë dhe po drejtohej sipër.  Ndërkohë që ai foli, indeksi nisi rënien si zakonisht dhe humbi 15 pikë”, shkroi Trump.   Ai shtoi se vende si Gjermania paguhen për të marrë para borxh, ndërsa interesat e Rezervës Federale janë të larta.

SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.