Ku ndodhet “Rana e Hedhun” e si mund të shkosh atje?
Është një plazh i mbrojtur që vazhdon të mbërthejë kuriozitetin e vizitorëve dhe pushuesve pasi duket sikur rëra ka nisur udhëtimin e saj drejt malit.
Rrethohet nga pylli dhe përbën tërheqjen më të madhe për këdo që kërkon të përjetojë pushime vërtetë ndryshe. Ndodhet 2.5 km nga qyteti i Shëngjinit në Bashkinë Lezhë dhe vlerësohet si një gjeomonument i rrallë.
“Rana e Hedhun” është një zonë ku duket sikur rëra i është sulur malit, shpati i të cilit është i mbushur me një rërë të imët. Ky plazh rrëzë malit të Rrencit të jep një pamje që nuk e ndesh askund përgjatë bregdetit Adriatik. Aty takohet rëra gri me detin e kaltër, ndërsa nuk mungojnë edhe shkëmbinjtë që zbresin nga mali dhe derdhen në det.
Kjo zonë bregdetare është e pa cënuar, me një natyrë të virgjër duke të krijuar idenë e një plazhi të “papërdorur”.
Ndërsa freskohesh në detin e kristaltë mund të shijosh edhe pyllin e dendur të pishave. “Emri “Rana e hedhun” ka mbetur nga legjenda, sipas të cilave rëra është hedhur afër pyllit nga një dorë e padukshme” shkruan “VisitLezha”.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.