Ku po orientohen bizneset? – Tregtia dhe riparimi i automjeteve, sektorët më tërheqës
5 muajt e parë të vitit kanë rezultuar pozitivë sa i përket iniciativave për hapjen e bizneseve të reja, ku në Qendrën Kombëtare të Biznesit janë regjistruar në total 9322 subjekte. Por kush janë sektorët që po tërheqin më shumë bizneset dhe ata më pak të kërkuar?
Sipas shifrave të QKB-së, të siguruara nga TV SCAN, vihet re se në krye të listës qëndron sektori i tregtisë me shumicë dhe pakicë si dhe riparimi i automjeteve dhe motoçikletave, ku për periudhën Janar-Maj 2018 janë regjistruar plot 2798 biznese, që përbën edhe shifrën më të lartë. Ndërsa një interes gjithashtu të lartë, ka pasur edhe sektori i akomodimit dhe shërbimit ushqimor me 2260 biznese të reja të regjistruara në këtë fushë.
Ndërsa kategori të tjera që kanë pasur një numër mesatar regjistrimesh rreth 400-500, janë shërbime administrative dhe mbështetëse; industria përpunuese; arsimimi; aktivitete profesionale ; shkencore dhe teknike; etj. Ndërsa numrin me të ulët të regjistrimeve të bizneseve të reja e ka pasur sektori i furnizimit me ujë, aktivitetet e trajtimit dhe menaxhimit të mbeturinave me vetëm 16 subjekte.
Kategoritë e regjistrimit të bizneseve të reja:
- Tregtia me shumicë dhe pakicë; Riparimi i Automjeteve dhe motoçikletave 2798 biznese
- Akomodimi dhe shërbimi ushqimor 2260 biznese
- Arsimimi 589 biznese
- Shërbime administrative dhe mbështetëse 576 biznese
- Aktivitete profesionale, shkencore dhe teknike 546 biznese
- Industria përpunuese 444 biznese
- Informacioni dhe komunikacioni 401 biznese
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.