Ku shkojnë paratë e bujqësisë? – Financim për 200 ferma organike, risitë e skemës
Rreth 16 milion dollarë do të shkojnë për fermerët gjatë këtij viti, duke u dhënë një ndihmë sado të vogël në zhvillimin e bujqësisë dhe blegtorisë, pavarësisht se fondet në krahasim me rajonin janë disa herë më të ulëta.
Megjithëse ky është muaji i aplikimeve për subvencione, Ministria e Bujqësisë ka bërë një parashikim paraprak se si do të shpërndahen paratë dhe kujt do ti jepet më shumë prioritet gjatë këtij viti.
Risi e skemave të financimit të drejtpërdrejtë të fermerëve gjatës 2017-ës, është mbështetja në masë më të madhe e bujqësisë organike, duke marrë parasysh avantazhet konkurruese që ka bujqësia në këtë drejtim.
Në rang kombëtar janë rreth 200 ferma të certifikuara të këtij formati, të cilat do të jenë përfituese të një subvencioni që do të shkojë deri në 200 mijë lekë për fermë. Njëkohësisht është zgjeruar baza e përfituesve në blegtori, pasi është ulur numri i krerëve për tufat e të imtave nga 100 në 50, duke tentuar dyfishimin e bazës së përfituesve në këtë sektor.
Mbështetja do të fokusohet edhe në pikat e mëdha të grumbullimit, magazinat frigoriferike, baxhot, punishtet, me synim që t’i jepet zgjidhje ndër vite, mbledhjes së prodhimeve të fermerëve, duke garantuar kështu nxjerrjen në treg të këtyre prodhimeve.
Ndërsa një pjesë e madhe e subvencioneve do të shkojnë edhe për sektorin akuakulturës, në ujëra detarë dhe ujëra të brendshëm, me qëllim krijimin e më shumë ofertave për tregun dhe konsumatorët e peshkut. Afati i aplikimeve për fermerët që duan të përfitojnë nga skemat mbështesë mbyllet më 31 Maj.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.