Kuba do të njohë pronën private në kushtetutën e re – Partia Komuniste sërish në krye
Kuba ka publikuar një përmbledhje të kushtetutës së rë, e cila me plot gjasa do të miratohet nga asambleja kombëtare këtë javë dhe do të njohë të drejtën e individëve për të zotëruar pronë private.
Prona private u ndaluar në Kubë pasi Fidel Castro dhe Partia Komuniste e tij morën pushtetin në vitin 1959, megjithatë shitjet janë lejuar që prej vitit 2011. Kushtetuta e propozuar do të njohë lirisht çdo pronë private, si edhe tregun e lirë, duke mbajtur një rol të fortë të qeverisë.
Kjo do të thotë se investitorët e huaj dhe kompanitë private do të kenë një mbrojtje ligjore më të mirë në këtë shtet. Por sërish ka dyshime mbi zbatimin e kësaj njohjeje, pasi qeveria kubane nxori një rregullore që përcakton se mund të konfiskojë pronën si masë administrative për personat që janë të vetëpunësuar.
Detajet e kushtetutës nuk janë bërë publike, por shtypi lokal njofton se do të dyfishohet numri i neneve në dokumentin ekzistues, të hartuar në vitin 1976.
Partia Komuniste do të vazhdojë të udhëheqë, por kushtetuta e re do të kufizojë postin e presidentit me dy mandate nga 5 vite. Gjithashtu do të shtohet edhe pozicioni i kryeministrit, i cili do të marrë detyrën e kreut të qeverisë.
Kushtetuta e re pritet të prezantohet këtë javë në asamblenë kombëtare nga presidenti Miguel Diaz-Canel, i cili zëvendësoi në Prill vëllain e Fidelit, Raulin. Ajo pritet të fitojë përkrahjen e parlamentit dhe do të votohet në referendum më vonë gjatë këtij viti.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.