Kufizimi i lëvizjeve ul shërbimet postare – AKEP: Në T4, 418,260 shërbime, 5.8% më pak se një vit më parë

Kufizimeve të lëvizjes për shkak të Pandemisë nuk i kanë shpëtuar as shërbimet postare, të cilat kanë rënë në mënyrë të dukshme krahasuar me një vit më parë. Në raportin për tremujorin e fundit të vitit 2020, AKEP raporton se krahasuar periudhën T3-2020, vërehet  një rritje e  numrit  të shërbimeve  postare  në  masën 9,038 shërbime,  sikundër  nga krahasimi  i tremujorit  të katërt të  vitit  2020 me  tremujorin  e katërt të  vitit  2019 vërehet  një rënie e shërbimeve postare në masën rreth 418,260 shërbime, ose me 5.8%.

Bazuar  në të dhënat  e paraqitura  nga AKEP,  Posta  Shqiptare  në  tremujorin  e katërt 2020 ka realizuar 5,273,223 shërbime postare, shifër e cila përkthehet në 4,673 objekte postare më pak se tremujori i tretë 2020, sikundër ofruesit e shërbimeve postare në tremujorin e katërt 2020 kanë realizuar 13,711 objekte postare më shumë se në tremujorin e tretë të vitit 2020.

Nga  të  dhënat  e  raportuara rezulton  se  volumin  më  të  madh  të  objekteve  postare  e  zë  shërbimi universal postar me rreth 72.7% ose 4,979,386 objekte postare, ndjekur nga shërbimi ekspres me 14.3% ose 976,160 objekte postare. Shërbimi jo universal zë 13% ose 893,257 objekte postare. Për sa i përket shërbimit jo universal postar, treguesit më të mirë i kanë Ofruesit e tjerë me 702,419 objekte postare ose 79% të tregut, kundrejt Postës Shqiptare me 189,838 objekte postare ose 21%.

Ndërsa për sa i shërbimit ekspres, gjatë tremujorit të katërt të vitit 2020 ka pasur rritjet e shërbimeve postare ekspres e krahasuar kjo me të njëjtën periudhë të vitit 2019, sikundër vërehet rritje në  shërbimet  postare  ekspres  për  tremujorin  e katërt të vitit  2020 e  krahasuar  kjo  me tremujorin paraardhës (T3–2020). Gjithashtu, për shërbimin ekspres vërehet një rënie e pjesëve të tregut për Postën Shqiptare, ku nga rreth 21% të tregut për këtë tregues në tremujorin e katërt të vitit 2019, pjesa e tregut të Postës Shqiptare në tremujorin e katërt të vitit 2020 ka arritur në rreth 11%, përkundrejt rreth 89% të ofruesve të tjerë.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.