Kujdesi i lëkurës, në stinën e pranverës! Këshilla dermatologjike për një fytyrë dhe trup sa më të freskët
Nga Migena Bushati
Lëkura është pasqyrë e shëndetit. Hidratimi i vazhdueshëm i lëkurës dhe mbrojtja e saj nga rrezatimi diellor janë faktorë për të pasur një lëkurë të shëndetshme.
Një lëkurë e shëndetshme garanton një pamje estetike dhe të bukur të fytyrës, si dhe përmirëson ndjeshëm imazhin tonë, por në stinët e pranverës dhe verës duhet të kemi më shumë kujdes nga rrezet e diellit. Dermatologia Violeta Dajçi, për “Scan Magazine”, do të na flasë pikërisht për këshillat që duhet të kemi parasysh.
A duhet t’i kushtojmë më shumë kujdes lëkurës, me ardhjen e pranverës dhe me ngritjen e temperaturave?
Pranvera është, jo vetëm stina më e bukur e vitit, por edhe stina më e shëndetshme për pjesën më të madhe të njerëzve. Drita, ngjyrat, rrezet e diellit, lulet dhe çdo cicërimë zogjsh zgjon edhe tek natyra njerëzore gjallëri dhe hare.
Duket sikur nis një jetë e re dhe njëkohësisht e bukur si vetë stina, por nga ana tjetër sjell një sërë alergjish që lidhen me lulëzimin e bimëve. Ky është dhe problemi madhor i stinës së bukur. Alergjitë më të mëdha shfaqen me prekjen e rrugëve të frymëmarrjes, por të shpeshta janë edhe prekjet në lëkurë. Ato shfaqen me skuqje, të kruara dhe shqetësime që të prishin cilësinë e jetës dhe të lënë pa gjumë.
Nga ana tjetër, rrezet e diellit në pranverë, janë shumë të shëndetshme dhe shumë të dëshiruara nga të gjithë. Kjo është arsyeja që ne biem në “kurthin” e tyre dhe në këtë periudhë pësojmë dëme në lëkurë.
Cilat janë përkujdesjet e para që duhet të kemi parasysh?
Kremrat me faktorë mbrojtës ndaj rrezeve UVA dhe UVB, në stinën e pranverës, e ndihmojnë lëkurën të marrë ngjyrë të bukur dhe njëkohësisht të jetë e shëndetshme. Duke aplikuar një krem të tillë në mëngjes, lëkura arrin të përthithë rrezet e dobishme, si dhe përzgjedh e refuzon rrezet që japin njolla që shkaktojnë rrudha dhe plakje të saj, djegie dhe më vonë kancere të lëkurës. Kujdesi për lëkurën në këtë periudhë nuk fillon e mbaron me një krem me faktor mbrojtës.
Larja dhe pastrimi i thellë saj largon pluhurat dhe sidomos agjentët alergjikë, të shumtë në këtë stinë, të cilët gjithashtu ndikojnë në dëmtimet e qelizave të lëkurës. Përzgjedhja e një kremi ushqyes për në darkë, sipas moshës, por edhe problematikave e nevojave të çdo tipi lëkure, e përmbyll më së miri kujdesin personal të çdo personi.
Kur flasim për lëkurën e fytyrës, a duhet të kemi të njëjtën përkujdesje dhe për trupin?
Lëkura e trupit është shumë më e mbrojtur nga të gjithë faktorët e jashtëm të stinës së luleve, por dhe të stinëve të tjera. Ajo ekspozohet më pak ndaj tyre për arsye se është e mbuluar. Nuk është në kontakt direkt me alergenët, rrezatimet, papastërtitë, të ftohtin dhe të ngrohtin.
Kujdesi në këtë stinë për lëkurën e trupit duhet të përqendrohet tek veshja e pështatshme, me qëllim ruajtjen e balancave të shkëmbimit të ujit dhe lëndëve të tjera, si kripërat dhe yndyrnat. Të gjitha këto arrihen me anë të djersitjes fiziologjike gjatë aktiviteteve sportive, që është shumë e shëndetshme dhe djersitjes së sforcuar nga veshjet jokomode (me trashë se duhet, sidomos gabimi që bëjnë nënat me fëmijët, apo dhe veshjet që nuk lejojnë ajrim të mirë të lëkurës).
Hidratimi me kremra në këtë stinë duhet të jetë normal, kryesisht pas dushit.
Sa e rëndësishme është përdorimi i kremit mbrojtës?
Në dermatologji ekziston që testim që quhet “testi i fotoplakjes”, i cili vërteton se sa ndikojnë rrezet e diellit në plakjen e lëkurës. Çdo person kur vjen në jetë, ka një lekurë të shëndetshme dhe të njëjtë në të gjithë sipërfaqen e trupit dhe fytyrës.
Kjo e fundit është zona më e ekspozuar në diell gjatë gjithë jetës. Zona pubike, ose bikini, është zona që nuk ekspozohet në diell. Krahasoni lëkurën e këtyre dy zonave, për të kuptuar sa ju ka dëmtuar dielli ndër vite.
Në cilën stinë dhe në cilën moshë duhet filluar vënia e kremit kundër diellit?
Nuk ka moshë përdorimi i tij. Të gjithë duhet ta përdorin dhe në të gjitha stinët. Në fëmijëri lëkura e pambrojtur nga rrezet e diellit, pëson dëmet e para të cilat shfaqen në moshat madhore. Djegiet që ndodhin në fëmijëri, lënë gjurmët e tyre në epidermë dhe dermë, të cilat me kalimin e viteve japin keratozat aktinike dhe kanceret e lëkurës.
Kujdes të veçantë në lëkurat e fëmijëve u duhet kushtuar nishaneve, të cilët duhet të lyhen me kremrat fotombrojtës më shpesh se pjesa tjetër e fytyrës apo trupit. Megjithatë duhet theksuar që rrezet e kësaj stine të bekuar, janë shumë të shëndetshme dhe rrisin imunitetin e fëmijëve, marrin pjesë në proceset fiziologjike të domosdoshme jetësore të qelizave të lëkurës dhe organeve të tjera. Lum ai që di t’i marrë me kujdes dhe të përfitojë nga të mirat e tyre!
Çfarë mund të themi për të moshuarit?
Në moshat e treta, dielli i kësaj stine është jetë dhe gjallërim. Qëndrimi në rrezet e diellit nuk ka efekte të rrezikshme në këtë periudhë, pasi fortësia e tyre nuk është maksimale, sipërfaqja e zbuluar është e vogël dhe qëndrimi jo për kohë të gjatë për arsye të vetë aktivitetit fizik të moshës.
Në këtë periudhë duhen trajtuar nga mjeku dermatolog edhe shenjat kafe ose plagët e vogla ekzistuese, si keratozat aktinike, seboroike, etj. Kremi fotombrojtës duhet pa ndërpreje, por ndoshta në këtë periudhë me SPF 20 deri në 30.
Sa u përket trajtimeve, cilat duhen aplikuar në këtë stinë?
Pranvera është stina më e bukur në të gjitha aspektet. Edhe për trajtimet kështu është. Të gjitha mund të behen dhe lëkura ndrin nën rrezet e buta dhe të bukura të diellit, nën veprimin e trajtimeve dermoestetike.
Mezoterapia dhe plazmotrapia janë të përzgjedhurat e stinës. Ato e rinojnë dhe i japin jetë lekurës njëlloj si pranvera. Qetësimi i rrudhave me injeksionet e botoxit, e bën njeriun ta presë verën i lumtur. Në këtë periudhë i kushtohet shumë rëndësi edhe trajtimit të celulitit.
Në praktikën dermatologjike rekomandohet radiofrekuenca dhe mezoterapitë me solucione të cilat shkrijnë qelizat dhjamore, qoftë në sipërfaqe të lëkurës, ashtu edhe në thellësi të saj.
Cilat janë këshillat e fundit nuk duhen harruar në asnjë moment?
Këshilla ime e rëndësishme është të mbroni nishanet, të gjithë. Vetëm ato mund të rrezikojnë jetën, të tjerat kanë zgjidhje. Të gjithë duhet ta shijojnë diellin dhe bukurinë e kësaj stine sepse rrezet e këtij dielli janë shumë të shëndetshme. Një krem fotombrojtës, vëreni çdo ditë. Lëkura e mbrojtur me kremra në këtë periudhë, merr ngjyrë të mrekullueshme dhe krijon mekanizmat e vet mbrojtës ndaj rrezeve të dëmshme që shtohen në stinën pasardhëse.
Nëse jeni duke marrë kontraceptivë, antibiotikë ose jeni në periudhën e bekuar të shtatzanisë, mbrohuni shumë nga dielli i pranverës. Ai ju bën me njolla kafe në trajtë fluture në fytyrë. Ruani fëmijët e vegjël nga diegiet se është shumë e rëndësishme për të ardhmen e largët të tyre.
SCAN Magazine
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.