Kujdesi paliativ – Nga buxheti i shëndetësisë, 25 milionë euro janë për këtë shërbim
Nga buxheti i shëndetësisë rreth 25 milionë euro janë të destinuara për kujdesin paliativ në vendin tonë. Por ky buxhet është i pamjaftueshëm për një shërbim kaq të rëndësishëm që ju ofrohet pacientëve në fazën e fundit të jetës.
Sipas deputetit të Partisë Demokratike Tritan Shehu buxheti nuk është i mjaftueshëm për kujdesin paliativ.
Sipas zëvendësministres së Shëndetësisë dhe të Mbrojtjes Sociale Mira Rakacolli në vendin tonë marrin kujdes paliativ rreth 1100 persona.
“Kujdesi paliativ është një qasje që përmirëson kualitetin e jetës së pacientëve dhe familjeve të tyre të cilët përballen me problemet e sëmundjeve kërcënuese ndaj jetës nëpërmjet parandalimit dhe lehtësimit të vuajtje përmes identifikimit të hershëm, vlerësimit të saktë dhe trajtimit të dhimbjes dhe problemeve të tjera fizike, psikologjike, psikosociale dhe shpirtërore’,- u shpreh zëvendësministrja duke shtuar se në zbatim të kuadrit ligjore shqiptar janë hartuar dhe miratuar aktet nënligjore të cilat vënë në zbatim ligjin për kujdesin paliativ. “Në nëntor të vitit 2014 u aprovua ligji i kujdesit paliativ, arritja më e rëndësishme në këtë fushë deri atëherë. Ky ligj e sheh shërbimin e këtij kujdesi si të drejtë njerëzore, multidimensionale, adreson nevojën për disponueshmëri të barnave themelore, rregullim në profesion të specialistit të kujdesit paliativ dhe shtrirjen e këtij shërbimi më gjerë. Në zbatim të këtij ligji kanë dal edhe aktet nënligjore të përcaktuara të cilat i detyronte ligji”, tha Rakacolli.
Kujdesi Paliativ duhet të ofrohet në të gjithë vendin dhe për këtë është e nevojshme që të ketë qendra të ofrimit në çdo rreth. Vlera financiare e ndërtimit të një qendre të tillë është rreth 350 mijë euro.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.