Kukësi “derdh” para për lidhjen e fshatrave me rrugën Nacionale/ Fondi dhe detajet e tenderit
Bashkia Kukës ka shpallur një tender për rikonstruksionin e rrugës automobilistike të fshatit “Malqene”, e cila i shërben komuniteteve të fshatit Malqene të lidhen me rrugën Nacionale Kukës – Peshkopi, nga qendra e komunës Ujmisht.
Fondi i vënë në dispozicion të projektit është 28.4 milionë lekë, ndërsa afati kohor për ekzekutim është 4 muaj, që nga nënshkrimi i kontratës me subjektin fitues.
“Zona e rrugës shtrihet në pjesën Verilindore të Shqipërisë dhe është një rrugë që i shërben komunitetit në këtë zonë për t’u lidhur me qytetin e Kukësit dhe me qendrën e Qarkut. Rruga që mendohet të ndërtohet do kalojë në trasë të mirë dhe në formacionet gjeologjike të qëndrueshme” specifikohet në detajet e tenderit.
Projekti i shpallur në Agjencinë e Prokurimit Publik do të qëndrojë i hapur deri më 8 korrik, ora 12:00.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.