Kultivimi e trafikimi i lëndëve narkotike. Opozita, akuza qeverisë për lidhje me krimin, Lleshaj: Situata është përmirësuar
Opozita parlamentare ka hedhur akuza mbi situatën e rendit, sigurisë dhe atë të kultivimit dhe shitjes së lëndëve narkotike. Gjatë një interpelance të thirrur nga një grup deputetësh opozitar me Ministrin e Brendshëm Sandër Lleshaj, deputeti Korab Lita u ndal te lidhjet e qeverisë më krimin sipas të cilit ka ndikuar në përkeqësimin e situatës sa i takon kultivimit të lëndëve narkotike apo dhe rritjen e krimit të organizuar.
“Ja vlejti jeta e dhënë e oficerit të policisë për luftën ndaj kultivimit të lëndëve narkotike duke parë se Shqipëria nga një pikë e zezë që ishte Lazarati u kthye në një Lazarat të tërë. Sot, kriminelët ju i keni miq, i keni shokë, bashkëpunoni me ta, darkoni me ta dhe kur i kapni i futni burg ata dorëzohen vetë, sepse e dinë që pas disa muajsh ata do dalin dhe do të mbjellin duhan.”
Këto akuza janë hedhur poshtë menjëherë nga Ministri Lleshaj i cili u ndal në shifra konkrete sipas të cilit tregojnë një trajektore në përmirësim të treguesve për kultivimin dhe trafikimin e lëndëve narkotike
“Dua tju them se për vitin 2020 autoritetet italiane kanë kapur vetëm 911 kg kanabis me origjinë nga Shqipëria. Po ashtu shifrat janë në nivele më të ulëta në Greqi dhe Mal të Zi dhe vendet e tjera duke dëshmuar se niveli i prodhimit dhe trafikimit nga Shqipëria ka rënë në minimumet historike.”
Lleshaj vlerësoi vitet e fundit si më të suksesshmit në të gjithë operacionet e ndërmarra duke veçuar operacionin Forca e Ligjit, sipas të cilit, janë konfiskuar 1381 pasuri të dyshuara si të gjeneruara nga krimi.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.