Kundërpërgjigjet Katari – Mund ta mbrojë fare lehtë ekonominë, vendet arabe do të humbasin
Ministri i Financave i Katarit, Ali Sherif al-Emadi, tha në fillim të kësaj jave se Katari mund ta mbrojë fare lehtë ekonominë dhe valutën kundër sanksioneve nga vendet arabe.
Ai shtoi se vendet që kanë shkëputur lidhjet ekonomike do të përballen gjithashtu me humbje për shkak të dëmtimit të biznesit në rajon.
“Shumë njerëz mendojnë se ne jemi të vetmit që humbasim nga kjo. Nëse ne humbasim 1 dollar, e njëjta gjë do të ndodhë edhe për ata”, tha Ministri i Financave i Katarit.
Arabia Saudite, Emiratet e Bashkuara, Bahreini dhe Egjipti, shkëputën lidhjet diplomatike dhe të transportit një javë më parë, duke akuzuar Katarin se mbështet terrorizmin.
Sanksionet kanë ndërprerë fluksin e importeve e shumë materialeve të tjera drejt vendit dhe kanë bërë që shumë banka të huaja të shkëpusin bizneset e tyre me Katarin.
Megjithatë, ministri tha se sektori i energjisë dhe ekonomia e eksportuesit më të madh në botë të gazit natyral të lëngshëm, janë duke operuar si zakonisht dhe se nuk ka patur ndonjë ndikim serioz në furnizimet ushqimore.
“Katari mund të eksportojë mallra nga Turqia, Lindja e Largët dhe Europa dhe do të reagojë ndaj krizës duke diversifikuar ekonominë më tej”, tha Ministri.
Valuta e katarit (Riyal) ka patur presione në tregjet e këmbimit, por ministri tha se kjo, përfshirë rënien me 10% të tregut të titujve të kapitalit, nuk përbëjnë shqetësim.
“Rezervat tona dhe fondet e investimeve kanë një vlerë prej më shumë se 250% në raport me PBB, kështu që nuk mendoj se ka arsye që njerëzit të shqetësohen për atë që po ndodh, apo për ndonjë spekulim mbi valutën”, tha Ministri.
Ndërsa pyetej nëse vendi do të duhet të gjenerojë para duke shitur zotërime në kompanitë e mëdha perëndimore të mbajtura në fondin e pasurisë sovrane, Ministri u përgjigj se nuk po konsiderohet aktualisht.
Çmimet e obligacioneve ndërkombëtare të Katarit kanë rënë ndjeshëm, por ministri tha se nuk sheh nevojën e ndërhyrjes së Qeverisë në tregje për të blerë titujt.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.