Kundravajtje në lëshimin e faturave tatimore – DPT: Rastet kur gjoba zbritet me 30%
Moslëshimi i faturës tatimore, dëftesës apo i faturës tatimore me TVHS dënohet me gjobë të barabartë me 100% të fitimit si rezultat i moslëshimit të faturës, përveç tatimit dhe kamatëvonesave që llogariten dhe paguhen në përputhje me dispozitat e ligjit për procedurat tatimore apo të ligjeve specifike tatimore.
Këtë e ka bërë të ditur Drejtoria e Përgjithshme e Tatimeve, ndërsa informon tatimpaguesit mbi ndryshimet ligjore për kundravajtjen në dokumentimin e transaksioneve. Sipas DPT-së, ndryshimi ligjor parashikon lehtësi për tatimpaguesin në rast se pranon vlerësimin tatimor dhe e paguan detyrimin dhe më pas gjoba zbritet me 30%.
Administrata Tatimore do të kryejë zbritjen e gjobës pas paraqitjes së kërkesës me shkrim së cilës i bashkëlidhet edhe mandati i pagesës nga tatimpaguesi pranë DRT-së përkatëse.
DPT thekson se kjo lehtësi zbatohet vetëm për dënimet me gjobë në rastet e kundërvajtjeve në lëshimin e faturave tatimore, dëftesave tatimore dhe dokumentimin e transaksioneve.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.