Kuotat në Universitete – Drejtësia, 50 kuota më pak se një vit më parë

Fakulteti i Drejtësisë ndryshe nga vitet e kaluara këtë vit akademik ka ulur numrin e kuotave të pranimit për ciklin e parë të studimit ndërsa mban të pandryshuar tarifën prej 40 mijë lekësh në vit.

Nga të dhënat e publikuara në faqen zyrtare të Universitetit të Tiranës rezulton se  ky fakultet edhe pse një ndër më të preferuarit për maturantët kandidat për student, bazuar në plotësimin e formularëve, ofron nga 750 kuota për vitin akademik 2017-2018 vetëm 700, ose 50 kuota më pak krahasuar me një vit më parë.

Ndërsa shtim kuotash vihet re në disa degë të fakultetit të shkencave sociale si në Filozofi ku numri i kuotave rritet nga 80 në 90 po ashtu edhe në degën e Sociologjisë nga 81 kuota në 100.

Rritje të numrit të kuotave për këtë vit akademik ka pasur edhe në fakultetin e gjuhëve të huaja si në Gjuhën Gjermane nga 120 në 140 kuota, Në Gjuhën Turke dhe Greke nga 85 në 90 secila, më pak kuota ofrohen për Gjuhën Ruse nga 85 në 80 dhe Spanjolle nga 95 në 90.

Ndërsa shumë fakultete të Universitetit të Tiranës përfshirë atë Ekonomik dhe ai i Shkencave të Natyrës vijojnë të mbajnë të njëjtë numrin e kuotave të pranimit edhe për këtë vit sikurse një vit më parë.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.