Kur do të ndodhë Brexit? – Ministrat dyshojnë për 29 Marsin. Paundi rritet ndjeshëm
Paundi britanik u rrit ndjeshëm në sesionin e fundit tregtar të kësaj jave, pasi kabineti i ministrave në Mbretërinë e Bashkuar bëri të ditur se janë rritur shanset e shtyrjes së datës së Brexit. Mediat britanike bënë të ditur se sipas ministrave, vonimi i datës së daljes është i mundur, për shkak të punëve të prapambetura në të paktën gjashtë ligje që duhet të kalohen përpara se Britania të dalë nga Bashkimi Europian.
Një nga Ministrat, tha për të përditshmen “Evening Standard” se “afati ligjor është shumë i ngushtë dhe se nëse ka një mposhtje në parlament ditën e Martë, nuk do të ketë mundësi të kalohen ligjet deri më 29 Mars”. Paundi u rrit pas lajmërimeve. Valuta qëndronte në 1.2720 kundër dollarit në nisje të tregtisë dhe u ngjit në 1.2840 pas komenteve. Britania pritet të dalë nga Bashkimi Europian më 29 Mars, por një shtyrje e kësaj date ka gjasa të ulë shanset e Brexit pa marrëveshje, diçka për të cilën tregjet dhe bizneset janë shqetësuar prej kohësh.
Një zëdhënës i Theresa May u përpoq menjëherë të hedhë poshtë raportin, duke thënë se liderja e Mbretërisë së Bashkuar nuk do të zgjasë afatin. Vonimi i datës së Brexit do të kërkojë miratimin e 27 liderëve të Bashkimit Europian. Parlamenti britanik pritet të votojë për marrëveshjen e Theresa May ditën e Martë. Deri më tani, paketa e May pritet të dështojë gjatë votimit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.