Kur do të rinisë mësimi në zonat e prekura nga tërmeti? Dy opsionet
Qeveria nuk ka marrë ende një vendim për kohën kur do të rifillojë mësimi në zonat e prekura nga tërmeti. Në mbledhjen e jashtëzakonshme të qeverisë, ministrja e Arsimit Besa Shahini parashtroi dy opsione; ose të pezullohet mësimi vetëm në qytetet ku është shpallur gjendja e jashtëzakonshme ose vetëm në shkollat ku ka pasur dëmtime.
“Nuk mendoj që në Durrës përkundër masave që kemi marrë është koha që të fillojmë mësimin të hënën. Mendoj që Tirana, Lezha dhe qarqet kanë nevojë për pak kohë që të bëhen riparimet e nevojshme që të hapen shkollat dhe rifillojë mësimi. Kemi dy opsione, që të rifillojë mësimi në të gjitha qarqet e paprekura, pasi kemi nevojë të fillojmë procesin e normalizimit dhe të bëjmë një shtyrje të rifillimit të mësimit në zonat ku kemi shpallur gjendjen e jashtëzakonshme. Një opsion i dytë më pak i preferuar nga ana jonë është që të mos fillojë mësimi vetëm në qarkun Durrës ndërsa në qarqet Tiranë, Lezhë të mos fillojë mësimi vetëm në shkollat e identifikuara me probleme. Por mendoj se kjo do paraqesë një çakordim të punës në këto qarqe. Duhet të marrim një vendim si kabinet” tha Shahini.
Shahini tha se janë në total janë 52 objekte shkollore ku nuk mund te kryhet mësim. Në këtë listë përfshihen edhe kopshte.
“Në qarkun e Durrësit janë 16 objekte shkollore dhe kopshte që janë të dëmtuara rëndë ose lehtë por që këto të fundit kanë nevojë për riparime dhe s’mund të hapen. Në qarkun Tiranë 23 shkolla të dëmtuara më rëndë apo pak më lehtë e që edhe ato nuk mund të rihapen menjëherë.
Në qarkun Lezhë janë 10 shkolla të dëmtuara, në qarkun Elbasan kemi edhe 3 shkolla të tjera të cilat janë të dëmtuara më rëndë apo më lehtë që gjithashtu nuk mund të rihapen menjëherë. Dëmtimet më Tiranë, Lezhë dhe Elbasan nuk janë të nivelit në Durrës por sidoqoftë ka nevojë për kohë për riparim” tha ministrja.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.