Kur hapen aplikimet për kompensimin financiar të pronave për 2020/ ATP: Dokumentacioni i nevojshëm
Fillimi i procedurave për kompensim financiar të pronarëve të pasurive të paluajtshme që preken nga ndërtimet informale do të fillojë me 13 janar. Agjencia e Trajtimit të Pronave ka publikuar datën e nisjes së pranimit të procedurave nëpërmjet një njoftimi zyrtar.
Subjektet e interesuara do të mund të paraqiten në zyrat e ATP-së nga e hëna në të premte, si dhe për pranimin e kërkesave, nuk është caktuar një afat i kufizuar në kohë. Më poshtë, lista e dokumentacionit që duhet paraqitur, në momentin e kërkesës për kompensim:
1.Kërkesën për kompensimin e pronës, sipas formatit tip, që i vihet në dispozicion nga ATP;
2.Dëshminë e trashëgimisë për të gjithë trashëgimtarët e ligjshëm të subjektit përfitues, sipas radhës së trashëgimtarëve, në përputhje me përcaktimet e Kodit Civil;
3.Prokurën e posaçme, të nënshkruar nga të gjithë subjektet që përfitojnë kompensim, ku si tagër i nevojshëm të jetë edhe e drejta për të tërhequr vlerën financiare, në emër të tyre. (Në rastet kur nuk është e mundur të dorëzohet prokura e posaçme, secili bashkëpronar apo një pjesë e tyre, paraqesin kërkesë individuale apo të përbashkët, për pjesën takuese në pronën që kompensohet. Në rastin e kërkesave individuale të secilit bashkëpronar apo të një pjese të tyre, për çdo kërkesë të kryer, paguhet tarifë shërbimi në vlerën 2 000 (dymijë) lekë, pavarësisht se i përket të njëjtës pasuri të paluajtshme);
4.Vërtetimin origjinal të lëshuar nga një bankë e nivelit të dytë për hapjen e llogarisë bankare në emër dhe për llogari të subjektit përfitues, ku përcaktohet edhe numri i llogarisë bankare (IBAN), ku do të transferohet vlera financiare e përfituar;
5.Fotokopjen e dokumentit të identifikimit;
6.Mandat pagesën, që vërteton pagimin e tarifës së shërbimit në vlerën 2 000 (dymijë) lekë.
Çdo subjekt i cili ka aplikuar më parë, por që për shkak të mungesave në dokumentacione nuk i është pranuar kërkesa ka të drejtën e riaplikimit, pa paguar tarifë shërbimi.
Jenida Vladi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.