Kur pagat rriten më shpejt se ç’duhet – Strategjia e Rumanisë për ngritjen e rrogave cënon konkurrueshmërinë
Rumania është vendi me ritmin më të lartë të shtimit të pagave në Bashkimit Europian, por vetë rumunët nuk kanë shumë për të fituar nga kjo.
Qeveria ka ndërmarrë një nismë për të rritur rrogat e administratës publike dhe pagën minimale, e kjo ka tërhequr nga pas edhe sektorin privat. Me produktivitetin që nuk po mundet të kapë ritmin, pasojat do t’i vuajë konkurrueshmëria.
Ky është një lajm i keq për inflacionin dhe rritjen ekonomike, sipas Lucian Croitoru, një këshilltar të politikave monetare të Bankës Qendrore të Rumanisë.
“Të mendosh se mund të dalësh me forcë nga kategoria e vendeve me krah të lirë pune është një iluzion. Konkurrueshmëria ekonomike e vendit po gërryhet”, tha ai.
Kritikat ndaj qeverisë janë të shumta dhe vlerësojnë se po ndërmerret një përqasje afat-shkurtër ndaj ekonomisë. Edhe pse rritja ekonomike ka tejkaluar nivelin 5% falë pagave të larta dhe shkurtimit të një sërë taksave, banka qendrore parashikon se kjo vjen në kurriz të rritjes së mëvonshme.
Punonjësit e sektorit publik përbëjnë një të tretën e forcës së punës në shtetin prej 19 milionë banorësh dhe përbëjnë bazën e votuesve të partisë social-demokrate në fuqi. Për të tërhequr edhe punëtorët më të varfër, partia ka vendosur edhe për dyfishimin e pagës minimale.
Efektet negative në ekonomi po bëhen të dukshme. Këshilli rumun për kompanitë të vogla dhe të mesme thotë se ¼ e ndërmarrjeve kanë ulur aktivitetin ekonomik ose janë mbyllur që nga Tetori i vitit 2015. Rritja në kostot e punës është një nga shqetësimet më të mëdha, së bashku me mungesën e krahut të punës, burokracitë, taksat e larta dhe korrupsionin.
Një shembull është prodhuesi britanik i veshjeve “Alison Hayes”, i cili mbylli fabrikën në Rumani në mars duke cituar si arsye kostot e shtuara të krahut të punës.
Kjo gjë nuk ka shkuar pa u vënë re. Rumania zhbëri katër vite rritjeje në konkurrueshmëri në 2016-ën, kur zbriti nga vendi i 62-të në atë të 138-të në renditjen globale të Forumit Botëror të Ekonomisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.