Kuroda dhe Carney në Davos – “Teknologjia financiare do godasë sistemin bankar”
Shefi i Bankës së Japonisë, Haruhiko Kuroda, tha se kompanitë e teknologjisë financiare (fintech), mund të shkaktojnë ndërprerje të sistemit bankar në ekonomitë e zhvilluara.
Ai tha se kompanitë e mëdha të teknologjisë zakonisht specializohen në pagesat dhe shlyerjet se sa në pranimin e depozitave dhe huadhënien, duke shtuar se këto mund të godasin sektorin bankar në mënyrë serioze. Bankat Qendrore të ekonomive në zhvillim, janë përpjekur të parandalojnë krizat financiare duke rregulluar sektorin tradicional bankar.
Por ndryshimet e mëdha në teknologjinë financiare po sjellin kompani të reja në industri, duke e bërë sfidues rregullimin e tyre. Kuroda paralajmëroi për rreziqet që krizat financiare mund të shkaktojnë jo vetëm në ekonomi por edhe në sistemin politikë, duke theksuar eksperiencën e Japonisë me flluskën e aktiveve në fundin e viteve 90’.
“Këto kompani të mëdha të teknologjisë po godasin sektorin bankar. Shumë vende po përpiqen të ndryshojmë rregullimin financiar, duke u përqëndruar te aktivitetet dhe jo te institucionet. Krizat financiare krijojnë jo vetëm probleme ekonomike por edhe destabilitet politik dhe Japonia i ka përjetuar këto situata shumë herët në krahasim me Europën dhe SHBA. Ky do të jetë një rrezik i madh për sistemin financiar, përfshirë jo-bankat.” – tha Haruhiko Kuroda.
Kuroda theksoi gjithashtu nevojën që bankat qendrore të jenë vigjilente ndaj rritjes së rrezikut ndaj sigurisë kibernetike. Të njëjtin problem e paraqiti edhe Guvernatori i Bankës së Anglisë, Mark Carney. “Duhen mbikëqyrur këto situata. Le të themi se disa shërbime bazë apo institucione mbyllen përkohësisht, çfarë do të bëjë sistemi për këtë? Është një fushë ku duhet punuar shumë” ,– tha Mark Carney.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.