“Kurorat e gjelbra të shkollave” – Klosi: 550 mijë pemë në 550-vjetorin e Skënderbeut
Jo vetëm shkollat në mbarë vendin, por çdo qendër e banuar do të ketë një mjedis të gjelbër. Ministri i Turizmit dhe Mjedisit Blendi Klosi bashkë me ministren e Arsimit Lindita Nikolla, lançuan nga Shëngjini, nismën kombëtare “Kurorat e gjelbra të shkollave”. Objektivi i nismës sipas ministrit Klosi është mbjellja e 20 milionë e 200 mijë pemë deri në vitin 2020, ku vetëm brenda këtij viti synohet mbjellja e 550 mijë pemë në kuadër të 550-vjetorit e Skënderbeut.
“Duke iu drejtuar pemëve, ne i drejtohemi jetës dhe prandaj në muajt në vazhdim ne do të përpiqemi që brenda këtij viti të mbjellim 550 mijë pemë në 550 vjetorin e Skënderbeut. Shkolla e Shëngjinit është një nga shkollat e para që i bashkohet nismës sonë të mbjelljes së kurorave të gjelbërta në çdo shkollë”, tha Klosi.
Ministrja Nikolla siguroi mbështetje për një mjedis të gjelbër dhe të shëndetshëm në shkolla.
“Do të jenë nxënësit, mësuesit dhe prindërit që do të japin modelin e tyre në këtë aksion. Ky është momenti i parë, por ne besojmë që kurorat e gjelbra do të bëhen fusha të gjelbra falë bashkëpunimit të shkëlqyer të mësuesëve, nxënësve dhe prindërve”, tha Nikolla.
Lançimi i këtij aksioni u bë nga ambientet e shkollës “At Zef Pllumi” në Shëngjin, ku nisi mbjellja e fidanëve të parë.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.