Kursi i këmbimit – Sejko: Nuk do të lejojmë mbiçmim të shpejtë të lekut
Presionet për mbiçmimin e lekut ngelen të larta dhe Banka e Shqipërisë çmon se ndërhyrja në tregun valutor duhet të vazhdojë. Pas mbledhjes së Këshillit Mbikëqyrës, Guvernatori Gent Sejko, tha të mërkurën se një forcim i shpejtë i lekut do të dëmtonte kthimin e inflacionit në objektiv. Këshilli Mbikëqyrës vendosi të mërkurën të ruajë të njëjtin kurs të politikës monetare, duke e mbajtur normën bazë në minimumin historik prej 1% dhe duke vazhduar programin e blerjes së valutës.
Ndërsa kreditimi i ekonomisë nuk po rritet, Banka e Shqipërisë konstatoi sërish se standardet e kreditimit të bankave ngelen konservatore. Guvernatori Sejko tha se rënia e kredive me probleme duhet të reflektohet në politika më aktive kreditimi nga sektori bankar.
Banka e Shqipërisë vlerësoi se rritja e lartë ekonomike në tremujorin e parë të këtij viti dhe rënia e papunësisë në nivelet më të ulëta historike dëshmojnë një shfrytëzim gjithnjë e më të mirë të kapaciteteve prodhuese në ekonomi. Banka qendrore pret që inflacioni të kthehet pranë objektivit 3% në vitin 2020, ndërsa rritja e normave të interesit nuk do të fillojë para mesit të vitit të ardhshëm.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.