Kursi i këmbimit, fundjavë pa surpriza – Valutat kryesore nuk njohin ndryshim nga dita e djeshme
Shporta e valutave kryesore ndërkombëtare ka mbetur e pandryshuar në raport me lekun ditën e premte, duke mos sjellë asnjë luhatje në çmimin e këmbimit valutor.
Euro, dollari amerikan dhe paundi britanik kanë qëndruar në vlerat e tyre, por me këtë të fundit që ndodhet në nivelin më të ulët të javës.
Valuta e Britanisë së Madhe ka pasur një vit me lëkundje të shpeshta, duke lëvizur pa një drejtim të caktuar. Pavarësisht ngecjes së negociatave me Bashkimin Europian për një marrëveshje pas Brexit, zgjedhjet e parakohshme parlamentare dhe rritja e qëndrueshme ekonomike kanë mundësuar që valuta të mos humbasë më shumë se 2% nga fillimi i vitit.
Në një rrugë të paqartë ndodhet edhe valuta europiane. Tashmë që në Gjermani janë të domosdoshme zgjedhje të reja, pas dështimit për të krijuar qeverinë, investitorët në këtë valutë mund të stepen. Mbi këtë rrezik peshon edhe vendimi i BQE për të mbajtur një politikë me pak rezistencë, çka sugjeron se mund të dobësojë euron në të ardhmen.
Ndërkohë, fundjava ka sjell luhatje vetëm për dollarin kanadez dhe frangën zvicerane. CAD është ulur me 0.3 pikë, ndërsa CHF ka shënuar një rritje të lehtë me 0.2 pikë kundrejt lekut.
Valuta | Shitet | Blihet |
EUR/ALL | 133.30 | 133.90 |
USD/ALL | 112.50 | 113.20 |
GBP/ALL | 149.70 | 150.50 |
AUD/ALL | 85.50 | 86.30 |
CAD/ALL | 88.20 | 89.20 |
CHF/ALL | 114.70 | 115.50 |
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.