Kursi i këmbimit, paundi dhe dollari kthehen me këmbë në tokë – Euro sërish i ulët në raport me lekun

Në mesjavë, valutat kryesore në tregun e këmbimit i janë rikthyer niveleve të ditës së hënë. Kjo do të thotë se dollari dhe paundi kanë rihumbur pikët e fituara gjatë së martës, duke u kthyer në kurset e këmbimit përkatëse me 114.5 dhe 150.3 lekë.

Shkak për rrëshqitjen e dollarit duket se janë bërë shqetësimet lidhur me vonesat në planin e reformës në taksa të propozuar nga presidenti amerikan Donald Trump. Dollari amerikan ishte ngritur në vlerën më të lartë prej 3 muajsh e gjysmë në raport me valutat e tjera kryesore, pasi pritshmëritë ishin se administrata do të kryente premtimin e shkurtimit të taksave.

Gjithsesi dollari mbetet ende në pozita favorizuese kundrejt euros, e cila duket se i është drejtuar një tjetër rënieje. Në raport me monedhën vendase, valuta europiane qëndron në nivelet më të ulëta të disa muajve, në nivelin 133 lekë.

Në normalitet ndërkohë është kthyer paundi britanik, i cili pas një rritjeje të shkurtër ditën e martë, është kthyer në kursin e 150.3 lekëve.

Ndërkohë, valutat e tjera si dollari kanadez, dollari australian dhe franga zvicerane kanë shënuar të gjitha rritje në krahasim me fillimin e javës, rritje e cila varion nga 0.2 lekë në rastin e dy dollarëve dhe 0.5 lekë në rastin e frangës zvicerane.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.