Kursim-krediti lë pas pandeminë – Aktivet prekin rekordin e 11.7 mld lekëve në T3, huaja rritet me 7.8%
Pas një rënie të lehtë në tremujorin e dytë të vitit, si rrjedhojë e pandemisë dhe masave kufizuese, shoqëritë e kursim kreditit i janë rikthyer rritjes në tremujorin e tretë. Të dhënat më të fundit të Bankës së Shqipërisë tregojnë se aktivet e këtyre shoqërive kanë prekur shifrën rekord historike prej 11.72 mld lekësh, ose rreth 9.45 mln euro, nga rreth 11.49 mld lekë që ishin në tremujorin paraardhës dhe nga rreth 11.55 mld lekë që ishin në tremujorin e parë të vitit, para se pandemia të godiste ekonominë. Aktualisht, në Shqipëri operojnë 14 shoqëri kursim-krediti dhe 1 union.
Kredia zë pjesën kryesore të portofolit të aktiveve të shoqërive të kursim kreditit, me afro 8.3 mld lekë, ose rreth 71% e totalit. Krahasuar me të njëjtën periudhë të një viti më parë, rritja e huadhënies ndaj anëtarëve të shoqërive fiksohet në masën 7.8%, sinjalizojnë të dhënat e Bankës së Shqipërisë për tremujorin e tretë të vitit. Pavarësisht rritjes, ky sektor zë pak më shumë se 1% të totalit të kredisë së sektorit bankar në vendin tonë. Shoqëritë e kursim kreditit janë të rëndësishme kryesisht për të financuar fermerët apo bizneset e vogla, veçanërisht në zonat rurale.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.