Kush përfiton nga lehtësitë në 2020-ën? Ndryshimet kryesore në taksa për bizneset dhe qytetarët
Parlamenti i ka hapur dritën jeshile hyrjes në fuqi të lehtësive fiskale për vitin 2020, për bizneset dhe qytetarët. Por cilat janë ato dhe kush përfiton më së shumti? Nga Janari 2020, do të aplikohet rivlerësimi banesave për ti sjellë ato nga vlera historike në vlerën reale të tregut me tatim fitim në masën 2 për qind nga 15 për qind.
Përfitues do të jenë 50 mijë pronar pasurish të paluajtshme, ndërsa për herë të parë do të përfitojnë edhe ata që i kanë të pa-hipotekuara. Një tjetër lehtësi, është heqja e tatimit prej 15 për qind në rastet e dhurimit të pronave apo truallit bujqësor nga prindi tek fëmija apo ndërmjet bashkëshortëve. Lëndët e para në import që do të përdoren nga subjektet për programin e rindërtimit do të jenë pa TVSH, si dhe nuk do të paguhet taksa e infrastrukturës për banesat që do të ndërtohen për këtë qëllim.
Po ashtu reduktim të shkallës së tatim fitimit do të ketë për industrinë automotive, në 5 për qind, një industri tërësisht e pazhvilluar në vendin tonë, si dhe është miratuar ulje të ngarkesës me taksa për automjetet luksoze.
Ndërkaq, do të aplikohen incentiva të reja lidhur me tatimfitimin për sponsorizimet ndaj ekipeve sportive; zgjatje nga 3 deri në 5 vjet e periudhës së mbartjes së humbjeve tatimore për disa investitorë; shfuqizim i kuadrit rregullator për pajisjes fiskale; do të aplikohet ligji i ri për fiskalizimin i shoqëruar me gjoba të rritura për bizneset; kufizime të reja për ndryshimin e deklaratave tatimore dhe listpagesave; mundësi për kompensim të tepricave kreditore dhe detyrimeve ndërmjet administrative doganore dhe tatimore; shkurtim i afateve të njoftimit të kontrolleve tatimore dhe vizitave fiskale.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.