Kushtetuesja me 2 anëtarë – Shkarkohet Dizdari për pasurinë dhe kontaktet e papërshtatshme

Komisioni i Pavarur i Kualifikimit ka shkarkuar anëtarin e Gjykatës Kushtetuese Gani Dizdarin për shkak të mosjustifikimit të pasurisë dhe kontakteve me persona të lidhur me krimin.

Dizdari nuk justifikoi dot 2 apartamente në Tiranë, një në Gjirin e Lalzit, si dhe një tokë arë me sipërfaqe 1 mijë metra katrorë në Bathore. Ndërkohë që pikëpyetje u ngritën edhe mbi disa llogari bankare si dhe një shumë prej rreth 4 mijë eurosh e marrë si dhuratë për t’u kuruar në Gjermani.

Por më shumë pikëpyetje Komisioni vuri mbi pasuritë e së bijës së gjyqtarit, e cila kishte blerë një apartament të shtrenjtë në Tiranë me burime të pajustifikuara financiare. Por nuk është pasuria i vetmi komponent që vuri nën akuzë Gjyqtarin e Kushtetueses.  Ai u gjend nën akuzë edhe si person me kontakte të papërshtatshme me një njeri të dënuar për ndikim të paligjshëm të zyrtarëve si dhe i lidhur me krimin me inicialet AL. Bëhet fjalë për nipin e gjyqtarit, ndërkohë që u bë me dije se Dizdari ka kaluar disa herë kufirin me mjetin e tij.

Sokol Hazizaj, Avokati i Dizdarit akuzoi se Komisioni i Vetting-ut po merr vendime me dy standarde të ndryshme dhe se do ta apelonte vendimin.

Përjashtimi i Gani Dizdarit e ka lënë Gjykatën Kushtetuese me vetëm dy anëtarë, duke e privuar nga çdo mundësi të kryejë funksionet e saj.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.