Kushtetuesja, ndërhyn Ambasada SHBA – Deklarata: Çojeni çështjen në Komisionin e Venecias. Presidenca: Tym diplomatik
Vetëm pak orë përpara se Apeli i Vetting-ut të shkarkonte Besnik Muçi, Ambasada ka reaguar lidhur me ngërçin e thellë ku është zhytur Gjykata Kushtetuese, duke i këshilluar palët t’i drejtohen Komisionit të Venecias për zgjidhjen e saj. Përmes një deklarate në faqen e vet zyrtare Ambasada vëren se Tashmë Shqipëria ndodhet në prag të ringritjes së Gjykatës së saj Kushtetuese, një hap madhor në procesin e reformës në drejtësi, por se ky përparim i nevojshëm ka ngecur për shkak të interpretimeve të ndryshme ligjore të procesit të emërimit. Institucionet gjyqësore shqiptare, kushtetuta dhe ligjet për zbatimin e reformës në drejtësi, duhet të udhëheqin procesin e zgjidhjes së këtyre interpretimeve të debatuara.
“Në mungesë të një institucioni të përshtatshëm ligjor, i cili mund të vendoste mbi interpretimet e kundërta, Shtetet e Bashkuara mbështesin çuarjen e çështjes në Komisionin e Venecias, si një palë e tretë kompetente dhe e paanshme, për opinionin e tij ligjor. Gjithashtu, nxisim palët kundërshtuese që të respektojnë opinionin ligjor të Komisionit të Venecias. Ecja në këtë drejtim do të ishte tërësisht në përputhje me aspiratat europiane të vendit”, thekson deklarata e Ambasadës së Shteteve të Bashkuara të Amerikës në Tiranë.
Pak pas deklaratës, ka reaguar ashpër edhe zyra e Presidentit, përmes zëdhënësit Tedi Blushi. Përmes nja statusi në rrjetet sociale, Zëdhënësi i Presidentit i cilëson ambasadorët në Shqipëri si pjesë e një grupi të strukturuar diplomatik në Tiranë bashkëfajtor për dhunimin sistematik të Reformës në Drejtësi. Por vijon më tej Meta, duhet të marrë fund sundimi i ambasadave dhe të fillojë sundimi i ligjit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.