Kuvendi Kombëtar i PD, Basha: 30% e shqiptarëve jetojnë me më pak se 4 dollar në ditë, qeveria ka braktisur vendin

30 për qind e shqiptarëve jetojnë sot me më pak se 4 dollar dita, ndërsa 70 për qind e të rinjve duan të largohen nga vendi. Kreu demokrat Lulzim Basha gjatë fjalës së mbajtur në Kuvendin Kombëtar të Partisë Demokratike deklaroi se qeveria ka shkatërruar ekonominë dhe ka braktisur njerëzit.

“Qeveria ka shkatërruar ekonominë, arsimin, ka vjedhur taksat, ka rrënuar shëndetësinë, ka vjedhur taksat për të shpërblyer oligarkun.

Kjo qeveria ka braktisur vendin dhe sot kemi një qeveri që vuri kriminelët në krye të shtabeve elektorale.

Ndërkohë ne shqiptarët e shohim sesi varfëria po bën kërdinë: 30 për qind e shqiptarëve sot jetojnë me më pak se 4 dollarë në ditë. Një bukë, 100 gramë djathë dhe dy domate. Mbi 180.000 mijë shqiptarë jetojnë edhe me më pak, me 3 dollarë në ditë. E prapë, qeveria hoqi 30 mijë familje nga skema e ndihmës ekonomike.

50 biznese mbyllen çdo ditë, por qeveria ka vendosur të fusë biznesin e vogël në skemën e TVSH, cka do shtojë zhurmën e rëndë të uljes së qepenave në përmasa të frikshme.

1 në çdo 3 të rinj shqiptarë sot është i papunë. 70 për qind e të rinjve duan të largohen nga vendi.

Konsumi ka rënë në nivelet më të ulëta historike.

Fondi Monetar Ndërkombëtar deklaroi hapur se PPP-te e qeverisë përbëjnë një rrezik thelbësor sepse ato janë të njëjta me huamarrjen dhe se qeveria duhet ta pezullojë dhënien e koncesioneve!

Shoqëria është e shpartalluar dhe e pa shpresë. Ekonomia është në katastrofë dhe se politika i ka braktisur njerëzit.

Ajo që na bashkon sot është dashuria për vendin dhe aspirata jonë historike për ta parë Shqipërinë si gjithë Evropa. Ajo që na bashkon sot është shqetësimi i thellë për kaosin ekonomik, depresionin shoqëror për udhëkryqin ku ndodhet vendi”.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.