Kuvendi s’humb kohë për Reformën në Drejtësi! Komisioni i Ligjeve shqyrton nismat për strukturat e reja
Komisionet kuvendore kanë nisur, pa humbur kohë, punën miratimin e nismave ligjore që shoqërojnë ndryshimet kushtetuese të Reformës në Drejtësi. Në mbledhjen e së martës, Komisioni parlamentar i Ligjeve do të shqyrtojë tre nisma të Reformës në Drejtësi.
Në rendin e ditës është parashikuar shqyrtimi në parim i projektvendimit “Për miratimin e strukturës dhe organikës së Kolegjit të Posaçëm të Apelimit të Gjykatës Kushtetuese”, shqyrtimi në parim i projektvendimit “Për miratimin e strukturës dhe organikës së Komisionit të Pavarur të Kualifikimit” dhe shqyrtimi në parim i projektvendimit “Për miratimin e strukturës dhe organikës së Komisionerëve Publikë”.
Ndërkohë, edhe qeveria në listën e vendimeve të para ka pasur 2 vendime që parashikonin transferimin në përdorim të ish godinës së Lidhjes së Shkrimtarëve për strukturat e reja të drejtësisë dhe nisjen e procesit te rikonstruksionit të godinës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.