Lagarde kritikon Gjermaninë – Suficiti i lartë rrit proteksionizmin nëpër botë
Akumulimi i suficiteve të larta të llogarive korrente në vende të ndryshme të botës, si në Gjermani, është përgjegjës për rritjen e proteksionizmit nëpër botë, deklaroi numri një i Fondit Monetar Ndërkombëtar, Christine Lagarde.
Këto deklarata vijnë menjëherë pas atyre të Jens Weidmann, i cili mbrojti politikat e qeverisë së tij për të mos shpenzuar, duke thënë se, Gjermania nuk ka pse të shpenzojë për të tjerët, pasi paratë i duhen për të ardhmen, pasi popullsia e vendit të tij po plaket.
Nga ana tjetër Gjermania është sulmuar vazhdimisht edhe nga administrata Trump për shkak të sufiçitit të lartë tregtar me Shtetet e Bashkuara të Amerikës.
“Një reduktim i sufiçitit të Gjermanisë do të ulte pabarazinë nëpër botë, një gjë për të cilën ne si Fond jemi të shqetësuar tej mase”, deklaroi Lagarde gjatë një konference në Frankfurt.
“Kjo rritje e retorikës proteksioniste apo edhe rrezikut proteksionist, padiskutim që është e lidhur me akumulimin e suficiteve të larta të llogarisë korrente në disa vende”, shtoi numri një i Fondit Monetar Ndërkombëtar.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.