Lagarde: Marrëveshja larg! “Lehtësimi i borxhit grek, europianët nuk dinë ç‘kërkojnë”
Fondi Monetar Ndërkombëtar dhe kreditorët europianë janë ende larg arritjes së një marrëveshje për lehtësimin e borxhit të Greqisë, pasi eurozona nuk është ende e qartë për atë që kërkon, deklaroi numri një i institucionit me bazë në Washington, Christine Lagarde.
Këto deklarata vijnë pas atyre të qeverive të eurozonës por edhe vetë qeverisë helene se lehtësimi i borxhit është shumë pranë. Por mesa duket, për Fondin Monetar Ndërkombëtar kjo nuk është aspak e vërtetë.
Zyrtarët më të lartë të zonës së monedhës së përbashkët dhe Christine Lagarde patën mundësinë të takoheshin gjatë samitit të G7-ës që po zhvillohet në Bari të Italisë, duke diskutuar kështu për Greqinë, pavarësisht se kjo çështje nuk është pjesë e axhendës zyrtare të samitit.
“Ne vijojmë të punojmë për paketën e lehtësimit të borxhit. Nuk ka ende mjaftueshëm qartësi. Parterët tanë europianë duhet të jenë më specifikë me termat e lehtësimit të borxhit”-nënvizoi Lagarde.
Fondi Monetar Ndërkombëtar e ka vendosur si kriter kyç lehtësimin e borxhit Helen për tu përfshirë në programin e trete të shpëtimit. Kjo përfshirje shtyhet prej kohësh pikërisht për shkak të përplasjeve mes FMN dhe eurozonës.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.