Lagjet e “pastreha” të kryeqytetit – Ish-blloku, kërkesën më të lartë për kredi të buta

Rreth 2250 qytetarët kanë aplikuar për programin e subvencionimit të kredive për vitin 2020, të aplikuar tashmë prej vitesh nga Bashkia Tiranë, dhe 2074 prej tyre kanë kaluar fazën e parë, për të ndjekur procedurën e mëtejshme, me dorëzimin e dokumentacionit përkatës. Por cilat janë lagjet që kanë shfaqur interesin më të lartë për të marrë një kredi të butë me qëllimin e blerjes së një shtëpie? Apo e thënë ndryshe cilat janë lagjet më të “pastreha” të kryeqytetit.

Sipas të dhënave zyrtare të Bashkisë Tiranë të përpunuara nga TV SCAN, për programin social të strehimit subvencionimi i interesave të kredisë 2020, njësia administrative nr.5 regjistron numrin më të lartë të aplikime me rreth 270. Kjo njësi përfshin zonën e ish-bllokut, Tiranën e Re, Komunën e Parisit, etj, që në fakt cilësohen dhe ndër zonat më të zhvilluara të Tiranë, por sërish kanë një kërkesë të lartë për kreditim me kosto të ulët nga ana e qytetarëve, gjë që mund të lidhet edhe me numrin e lartë të popullsisë në këtë njësi.

Në vendin e dytë renditet njësia nr.7 që përfshin zonën e 21 Dhjetorit me 240 aplikime dhe në vendin e tretë njësia nr.2 e cila përfshin Rrugën e Elbasanit,  me 236 aplikime.  Ndërsa nga lagjet e reja të Tiranës, lagjja nr.13 që përfshin Kodrën e Diellit dhe Selitën ka shfaqur interes të lartë.

Numri më i ulët i aplikimeve paraqitet kryesisht në periferitë e kryeqytetit, të cilat mesa duket nuk “vuajnë” për shtëpi apo nuk arrijnë të plotësojnë kushtet për përfitim,  ku asnjë rast aplikimi nuk është bërë nga njësia Zall Herr, ndërsa njësitë e tjera si Petrelë, Bërzhitë,Zall-Bastar kanë një numër shumë të ulët aplikimesh, thuajse të papërfillshëm. Sa i takon lagjeve historike të kryeqytetit, njësia nr.10 ka shfaqur interesin më minimal me 81 aplikime.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.