Lajm i mirë për ata që këmbejnë euro dhe paund gjatë festave – Valutat fitojnë vlerë ndaj lekut

Tregu i këmbimit valutor, ditën e premte ka regjistruar një dobësim të lekut ndaj valutave kryesore. Me përjashtim të dollarin amerikan, monedhat e tjera tashmë ndodhen në nivelin më të lartë të javës kundrejt valutës vendase.

Euro, e cila e kishte nisur javën në vlerën e 132.2 lekëve, tashmë ka vijuar ngjitjen, duke u këmbyer për 132.7 lekë. Ky është një lajm i mirë për të gjithë ata që do të këmbejnë euro në këtë periudhë.

Teksa vlera e valutës së përbashkët europiane favorizon në krahasim me fillimin e javës individët që kanë marrë remitanca, pra dërgesa në para nga familjarët jashtë shtetit, po ashtu të favorizuar vazhdojnë të jenë ata që do të bëjnë dhurata duke blerë produkte me euro.

Pavarësisht se kapi kulmin e javës, euro vazhdon të mbetet larg niveleve të mesit të dhjetorit.

Në të njëjtën mënyrë, lajmet janë pozitive edhe për ata që kanë remitanca nga Britania e Madhe. Paundi kapi sot vlerën e 149.4 lekëve, në rritje me 0.4 pikë nga dita e mëparshme.

Ngjitja më e madhe sakaq i takon frangës zvicerane, e cila pasi kishte qëndruar e pandryshuar për disa ditë, tashmë është forcuar me 0.7 pikë ndaj lekut. Rritje të forta kanë regjistruar edhe dollari kanadez dhe ai australian, me përkatësisht 0.7 dhe 0.6 pikë kundrejt lekut.

E vetmja valutë që nuk është forcuar, por në të kundërt, është dobësuar ndaj monedhës vendase është dollari amerikan. Monedha e Shteteve të Bashkuara ka rënë me 0.3 pikë në nivelin e 111 lekëve.

Por për investitorët, një dobësim i dollarit shpjegohet vetëm si i përkohshëm, pasi valuta ka tendencën të dobësohet pas Krishtlindjeve, për të arritur më pas sërish vlerën e mëparshme, ditët e para të vitit të ardhshëm.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.