Lamtumirë roaming! – Jo më çmime të kripura në BE pas 15 qershorit
Prej datës 15 Qershor në Bashkimin Europian ka hyrë në fuqi eliminimi i tarifave roaming, një masë që pritej prej kohësh, sidomos nga turistët dhe biznesmenët.
Debati dhe beteja për heqjen e tarifave mjaft të kripura për shërbimin roaming, pra shfrytëzimin e operatorit celular në një vend tjetër, e në rastin në fjalë në Bashkimin Europian, zgjat prej me shumë se një dekade.
Pavarësisht heqjes së tarifave, kompanitë celulare mund të vendosin disa tarifa shtesë për klientët që shpenzojnë më shumë seç duhet.
Brukseli vendosi që të bëjë këtë lëvizje rreth një vit më parë, pas referendumit të Brexit duke dhënë një sinjal të vogël se Europa është e bashkuar.
Pavarësisht se tashmë ka hyrë në fuqi direktiva e re, vendet e Europës së Jugut, që është më e varfër se pjesa tjetër e Europës, por që ka edhe më shumë turizëm, i tremben faktit se, kjo lëvizje do të detyrojë kompanitë celulare që të rrisin çmimet për shërbimet brenda vendit.
Eliminimi i tarifave Roaming nuk përkthehet në eliminim të pagesave që kompanitë celulare i bëjnë njëra tjetrës për shkëmbimin e shërbimeve, dhe kjo pritet të sjellë probleme, duke rritur kostot.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.