Largimet nga puna, dëmshpërblimet – Udhëzim i ri për ekzekutimin e vendimeve gjyqësore, ja ndryshimet
Rishfaqja e detyrimeve masive të prapambetura të krijuara nga vendimet gjyqësore për largimet nga puna kanë vënë në lëvizje Ministrinë e Financave. Vetëm për tre muajt e parë të vitit, 6 Ministri kanë akumuluar një total borxhi prej rreth 15 milionë dollarësh në formën e vendimeve gjyqësore të paekzekutuara. Në fund të muajit të shkuar Ministria e Financave ka miratuar disa ndryshime në udhëzimin për ekzekutimet e vendimeve gjyqësore.
Udhëzimi i ri përcakton që dikasteri përgjegjës duhet të raportojë jo më vonë se data 20, e çdo muaji, në lidhje me ekzekutimin e vendimeve gjyqësore të muajit të kaluar. Gjithashtu përcakton se struktura përgjegjëse për ndjekjen e çështjeve gjyqësore mban database të veçantë për vendimet me objekt: kthim page; dhe dëmshpërblim për largim nga puna dhe database të veçantë për vendimet e tjera.
Prioritet dëmshpërblimi do te kenë punonjësit e larguar që mbushin moshën e pensionit, si dhe ata të cilëve u është ekzekutuar pjesërisht vendimi i gjykatës duke i rikthyer në punë.
Ndryshimi tjetër thelbësor i procedurave të ekzekutimit u jep tagrin vetë institucioneve të shlyejnë shumat e vendimeve gjyqësore pasi u çelet fondi përkatës Ministria e Financave.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.