Largimi i firmave financiare pas Brexit – Banka e Irlandës jep mbi 100 autorizime për operacionet në Dublin

Mbi 100 firma të shërbimeve financiare janë autorizuar nga Banka Qendrore e Irlandës që të zhvendosin operacionet atje,  për shkak të planit të Britanisë për të dalë nga Bashkimi Europian, sipas zv/guvernatorit Ed Sibley.

Bankat, kompanitë e sigurimeve dhe manaxhuesit e portofolëve janë përpjekur këto 3 vite që të zhvendosin operacionet në Dublin dhe qendra të tjera financiare si Parisi, Frankfurti, Amsterdami dhe Luksemburgu. Këto masa janë marrë në mënyrë që firmat të vazhdojnë t’i shërbejnë klientëve europianë pas Brexit.

Banka Qendrore e Irlandës ka thënë se ka proçesuar shumicën e mbi 100 aplikimeve nga firmat. “Kemi ende shumë aplikime në zhvillim, ku shumica pritet të përfundojnë përpara 31 Tetorit”, tha zv/guvernatori.

Sipas tij, entet e mëdha përfshirë Barclays dhe Bank of America që kanë caktuar selitë europiane në kryeqytetin e Irlandës, janë miratuar.

Sibley tha se janë marrë masa parapërgatitëse për daljen pa marrëveshje në sektorin e shërbimeve financiare të Irlandës dhe sistemi është i gatshëm për t’i bërë ballë daljes së Britanisë pa një marrëveshje të divorcit. Irlanda konsiderohet si vendi anëtar i Bashkimit Europian me ekspozimin më të madh nga ky rezultat.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.