Le Pen mundet me “KO”, Macron: Plani jot shkatërrim, po kërkon luftë monedhash
Emmanuel Macron është fituesi i debatit final për garën presidenciale në Francë, tashmë i zhvilluar mes dy kandidatëve të mbetur në garë. 63% e shikuesve i kanë dhënë atij fitoren në këtë debat kundër Marine Le Pen.
Debati ka qenë mjaft i ashpër, në një kohë që Macron kryeson sondazhet me rreth 20 pikë diferencë kundrejt rivales së tij të ekstremit të djathtë. Dy rivalët u përplasën ashpër në dy pika kryesore; euron dhe terrorizimin.
Le Pen akuzoi Macron se si ish bankier është një ithtar i globalizimit të egër, ndërkohë që ky i fundit e akuzoi se plani i saj për braktisjen e euros do të ishe fatal për francën dhe Europën.
Ajo që të propozon është një luftë monedhash”-i`u drejtuar Macron rivales së tij. Ky i fundit nënvizoi se, Le Pen nuk ka një plan për të realizuar kalimin nga euro te franga.
Ndër të tjera, Macron akuzoi Le Pen për mungesën e një programi ekonomik, kryesisht sa i përket luftës ndaj papunësisë kronike. Debati në këtë pikë kaloi deri në ofendime personale mes dy kandidatëve.
Një tjetër çështje e nxehtë gjatë debatit që zgjati dy orë e gjysmë ishte edhe terrorizmi. Debati final konfirmoi edhe njëherë betejën mes dy vizioneve krejt të kundërta, jo vetëm për Francën, por edhe për politikën globale.
Ndërkohë që Macron bën thirrje për reforma liberale që të nxisin ekonominë, Le Pen bën thirrje për masa proteksioniste që të mbrojë vendet e punës.
Ekspertët shprehen se, Le Pen hyri me një qëllim të vetëm në këtë debat, të shtynte Macron drejt një gabimi të vetëm, dhe nuk ja doli.
“Ti qëndro në televizor. Unë dua të bëhem President i këtij vendi”-i`u drejtua Macron, Le Pen në fjalën mbyllëse të debatit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.