Lehtësi fiskale për bizneset – Ahmetaj: Përfitojnë 91 për qind e sipërmarrjeve dhe agroturizmi
Rreth 91 për qind e sipërmarrjes në vend është lehtësuar nga barra fiskale. Kështu është shprehur Ministri i Financave dhe Ekonomisë, Arben Ahmetaj, gjatë fjalës së tij në Parlament, ku theksoi se vetëm me paketën e fundit fiskale, qeveria ka ulur ndjeshëm taksat dhe i ka dhënë prioritet zhvillimit të agroturizmit. Ndërsa, duke iu përgjigjur akuzave të opozitës, Ahmetaj theksoi se nuk ka rritje të çmimeve.
“Me këto lëvizje, me këto lehtësime fiskale që po bën qeveria sot dhe që aprovon ky Parlamet, 91% e sipërmarrjes në Republikën e Shqipërisë e ka tatim fitimin ose zero ose 5%. Tani vijmë këtu pas pesë vitesh dhe gjithë ajo bolori antipolitike, parapolitike “u rritën taksat, u rritën taksat”. U ulën taksat. U fermentua çdo ditë e njëjta bolori “taksa, taksa”. Ja ku janë, biznesi i vogël deri në 5 milionë lekë e ka zero lekë tatim fitimin, zero! U rrit pragu nga 8 në 14. 91% e sipërmarrjes sot e ka ose zero tatim fitimin ose 5%, nga 15 %”, u shpreh Ahmetaj.
Ndërsa, Ministri Turizmit, Blendi Klosi theksoi se kjo paketë është domosdoshmëri për t’i dhënë hov zhvillimit të agroturizmit dhe për ta bërë këtë sektor konkurrues.
“Ato çfarë ne duam të ngremë në Shqipëri, rrjeti i tërë i agroturizmit, i cili sot merr një mbështetje shumë të madhe edhe ligjore është rrjeti i shumë e shumë fermerëve të vegjël apo të mesëm. Fshati i tyre që ka traditë në agroturizëm mund të shndërrohet në një pikë të vizitueshme nga turizmi shqiptar dhe nga turizmi i huaj. Mund të shndërrohet në një arsye më shumë që vetë ne, familjarët shqiptarë, të kemi mundësi që gjatë fundjavave të kemi mundësi të kalojmë nëpër këto pika agroturizmi, të ndihmojmë biznesin lokal dhe të futemi në një rrjet, i cili sot në Shqipëri ka pionierët e tij të parë”, u shpreh Klosi.
Parlamenti diskutoi të gjitha projektligjet fiskale që synojnë të mbështesin sipërmarrjen dhe që hyjnë në fuqi nga 1 Janari 2019.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.