Lehtësime të tjera për sektorin minerar – Ndryshimet ligjore/ Pas zerimit të rentës, ulet garancia financiare
Pas përjashtimit nga taksa e rentës minerare për kromin dhe bakrin, qeveria kërkon lehtësime të tjera në drejtim të investimeve në sektorin minerar. Sipas një projektligji të depozituar në Kuvend, parashikohet që detyrimi për depozimtimin e garancisë financiare të investimit për lejet e kërkim-zbulimit ulet në masën 10% . Aktualisht kjo vlerë është e barabartë me vlerën e investimit që është parashikuar të kryejë shoqëria çdo vit, por shoqëritë minerare e konsiderojnë si një barrë shumë të rëndë financiare, pasi bllokon një pjesës të likujditeteve të shoqërisë.
Gjithashtu, projektligji parashikon transferimin e lejeve të dhëna me procedurë konkuruese, që deri më tani ka qenë një prej probleve në zhvillimin e tregut minerar. Kështu, duke marrë në konsideratë dinamikën e ndryshimeve që mund të ketë një shoqëri tregtare gjatë zhvillimit të veprimtarive të ndryshme që ajo mund të zhvillojë (jo vetëm në aktivitetin minerar) është propozuar që të lejohet mundësia e transferimit të lejeve të dhëna me procedurë konkurruese pas një periudhe 5-vjeçare nga data e dhënies së lejes dhe transferohen vetëm pas miratimit paraprak të ministrit.
Ndërkaq, sa i takon zgjatjes së afatit të lejes minerare, ajo do të bëhet vetëm kur vazhdimi i shfrytëzimit nuk bie ndesh projekte të tjera që kanë interes publik. Nga ana tjetër me ligjin e ri, subjekteve që zotërojnë leje shfrytëzimi me karrierë të mineraleve dhe grupit të mineraleve ndërtimore u jepet e drejta e pezullimit te përkohshëm te veprimtarisë së shfrytëzimit në zonën e lejuar. Pak ditë më parë Komisioni parlamentar i Ekonomisë miratoi përjashtimin nga taksa e rentës minerare për grupin e mineraleve metalore, me argumentin se sektori është një nga më të goditurit nga pandemia COVID-19. Sipas të dhënave të Ministrisë së Financave për 11-mujorin, të ardhurat nga mineralet e eksportuara kanë pësuar rënie në masën 30 milionë lekë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.