Lehtësimi i lëvizjes rrit 79% sigurimin kufitar – AMF: Numri i kontratave u shtua me 90%, Karton Jeshil rritje prej 12.08%
Lehtësimi i lëvizjes në gjysmën e parë të këtij viti krahasuar me një vit më parë, kur kufijtë mbetën thuasje të mbyllur është reflektuar menjëherë në treguesit financiarë të tregut të sigurimeve. Është produkti Sigurimi i Kalimit Kufitar ai që e tregon në mënyrë mjaft eksplicite këtë ndryshim, duke parë se kontratat e këtij portofoli thuajse janë dyfishuar krahasuar me gjysmën e parë të vitit të shkuar. Autoriteti i Mbikëqyrjes Financiare raporton se Produkti Sigurim Kufitar, në periudhën janar-qershor, pati një rritje 79.88% të vëllimit të primeve të shkruara bruto krahasuar me periudhën janar-qershor 2020. Edhe numri i kontratave u rrit me 90.69%.
Portofoli I sigurimit të makinave ka qenë një tjetër prej treguesve në rritje në këtë sector. Primet e sigurimit të detyrueshëm motorik, gjatë periudhës janar-qershor 2021 arritën rreth 5 miliardë lekë, ose 11.57% më shumë se në periudhën janar-qershor 2020.
Produkti MTPL e brendshme, termi për kontratat e sigurimit të mjeteve, në periudhën janar-qershor, pati një rritje prej 10.41% të vëllimit të primeve të shkruara bruto. Kjo u shoqërua edhe me një rritje të numrit të kontratave prej 12.07% krahasuar me periudhën janar-qershor 2020.
Ndërkaq, Produkti Karton Jeshil në periudhën janar-qershor pati një rritje prej 12.08% të vëllimit të primeve të shkruara bruto. Kjo u shoqërua nga një rritje e numrit të kontratave prej 16.02% krahasuar me periudhën janar-qershor 2020.
E kundërta la ndodhur me shumat e dëmeve që kanë paguar kompanitë në favot të klientëve. Gjatë periudhës janar-qershor 2021, dëmet e paguara bruto në tregun e sigurimeve, arritën në rreth 3,742 milionë lekë, ose 8.3% më pak se në periudhën janar-qershor 2020, ndikuar kryesisht nga pagesa e konsiderueshme e dëmeve të tërmeteve përgjatë vitit 2020.
Lidhur me tregun në tërësi, Të ardhurat nga primet e shkruara bruto të sigurimit për periudhën janar-qershor 2021 kapën vlerën 8,8 miliardë lekë, ose 17.53% më shumë se në periudhën janar-qershor 2020. Gjatë periudhës janar-qershor 2021, numri i kontratave të sigurimit të lidhura arriti në 467,511 me një rritje prej 7.48% krahasuar me periudhën janar-qershor 2020.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.