Lehtësimi i masave gjallëron lëvizjen e shtetasve – Rriten hyrje-daljet për majin, shtetasit nga Kosova që hyjnë në Shqipëri tejkalojë 2019-ën

Lehtësimi i disa masave në drejtim të lëvizjes ka ndikuar në rritjen e numrit të shtetasve shqiptarë dhe të huaj që kanë hyrë në vendin tonë. Sipas të dhënave nga Instituti i Statistikave, për muajin maj në vendin tonë kanë hyrë 605 421 shtetas, një tregues që ka pësuar rritje me 13 herë në raport me majin e vitit të kaluar, ku lëvizjet e shtetasve ishin tejet të kufizuara.

Rritje  më të madhe për këtë muaj ka pësuar hyrja e shtetasve të huaj, ku sipas të dhënave zyrtare numërohen 328 742 shtetas apo 20.1 herë më shumë se muaji maj i vitit 2020. Rritje për muajin maj kanë pësuar edhe daljet e shtetasve shqiptarë e të huaj, ku sipas INSTAT rezultojnë 14.4 herë më shumë se e njëjta periudhë e një viti më parë. Sa i takon 5-mujorit, pavarësisht se në krahasim me vitin 2020 ka një rritje të numrit të hyrjeve dhe daljeve të shtetasve shqiptarë e të huaj, ende nuk janë arritur nivelet e vitit 2019, që nuk ishte një vit pandemik. Sipas të dhënave të INSTAT për periudhën janar-maj 2019, kanë hyrë dhe dalë nga territori shqiptar 7 238 171 qytetarë apo 37% më shumë se 5-mujori i vitit 2021.

Gjatë pesëmujorit të  parë  të 2021,  ndër  vendet  që  kanë  hyrjet  më  të  larta  të  shtetasve  në  Shqipëri, Polonia ka pasur rritjen më të madhe me 4,5herë dhe Zvicra me 3,2 herë. Megjithatë, hyrjet nga Kosova përbëjnë pjesën më të madhe të shtetasve të huaj që kanë hyrë në Shqipëri, me 525.359, duke tejkaluar edhe shifrat e vitit 2019, ku për periudhën janar-maj nga Kosova hynë në Shqipëri 395.099 shtetas. Ndërkaq, uljen më të ndjeshme të hyrjes së shtetasve në Shqipëri e  ka  pasur Greqia  me 68,9  % dhe Anglia  me 36,8%,  krahasuar  me të  njëjtën  periudhë  të  vitit  2020. Hyrjet dhe daljet e shtetasve pritet të rigjallërohen edhe më tej, pas lirimit të masave kufizuese që po ndërmarrin shtete të ndryshëm, teksa në një njoftim për shtyp Këshilli i Evropës njoftoi se “nga 18 qershori 2021 vendet anëtare duhet të heqin gradualisht kufizimet e udhëtimit në kufijtë e jashtëm për banorët e vendeve të treta”, duke përfshirë edhe Shqipërinë.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.