Lehtësimi i procedurave për anijet e peshkimit – Voda: Do të rishikohen kërkesat për analizën e kontrollit dhe lëvizjen e tyre natën

Zëvendësministrja e ministrisë së Brendshme, Rovena Voda ka zhvilluar një interpelancë përmes platformës së bashkëqeverisjes me përfaqësues të Konfederatës së Prodhuesve Shqiptarë të Peshkimit dhe Akuakulturës për lehtësimin e procedurave të nisjes dhe mbërritjes së anijeve të peshkimit në porte.

Përfaqësuesit e KPSHPA-së  kanë cilësuar si një pengesë shumë të madhe procedurat e kontrollit. Ndërkohë, i kanë kërkuar zv. ministres Voda dhe përfaqësuesve të policisë që analiza e kontrollit të kryhet në bazë të analizës së riskut si dhe të lejohet peshkimi jo vetëm gjatë ditës, por edhe natën.

Në përgjigje të tyre, zëvendësministrja e ministrisë së Brendshme, Voda është shprehur kërkesat e tyre do të rishikohen dhe do të merren masat e nevojshme që të realizohen. Sipas saj, lidhur me analizën e kontrollit dhe daljen e anijeve natën, që e ka cilësuar edhe si të padrejtë, do të ecet shumë shpejt, ndërsa do të ketë një rishikim edhe për procedurat e kontrollit.

“Me dy kërkesat e para do të ecim shumë shpejt. Sa i përket procedurave të kontrollit, nuk mund të ketë një kontroll të detajuar 100 për qind për çdo peshkarexhë”, tha Voda.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.