Lehtësitë doganore me Kosovën – Biznesi kërkon korsi të veçantë për mallrat me origjinë shqiptare
Edhe pse janë lehtësuar shumë procedura doganore, përsëri biznesi ka një sërë kërkesash për qeverinë. Kështu Unioni i Dhomave të Tregtisë dhe Oda ekonomike e Kosovës nëpërmjet një deklarate të përbashkët i kanë drejtuar qeverive të dy vendeve kërkesat për lehtësim të procedurave doganore.
Sipas kësaj deklarate, biznesi kërkon që për mallrat me origjinë shqiptare dhe kosovare të përdoret një korsi e veçantë, nëpërmjet së cilës kalimet nuk do të bëhen me procedura klasike doganore, por vetëm më një autorizim, i cili do të lëshohet nga një operator ekonomik, i njohur nga dy doganat.
Çdo ditë e më tepër po flitet për bashkëpunimin ekonomik midis Shqipërisë dhe Kosovës. Por përfaqësuesit e biznesit të dy vendeve shprehen se problematikat janë të shumta dhe se tregtia po i has edhe në barrierave jotarifore.
Marrëveshje të shumta janë nënshkruar midis dy qeverive për të lehtësuar këto barriera, por duket se biznesi në terren ende i ndjen.
Shkëmbimet tregtare mes dy vendeve janë rritur gjatë viteve të fundit, por përsëri llogaritet se janë nën potencial. Ndërkohë që tashmë gjithnjë e më tepër po flitet për një zonë ekonomike rajonale ku biznesi shqiptar pritet të përballet edhe me vështirësi të reja.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.