Lehtësitë për biznesin – Saraçi: Të rriten shërbimet nga dhomat e tregtisë
Gjatë viteve të fundit janë ndërmarrë një sërë ndryshimesh në legjislacion dhe përmirësimi i shumë procedurave për sipërmarrjen. Por, sipas sekretares së Përgjithshme të Unionit të Dhomave të Tregtisë, Majlinda Saraçi, kalimi i një sërë shërbimesh pranë dhomave të tregtisë do të jetë një lehtësi për biznesin. Sipas saj, me miratimin e ligjit të dhomave do të synohet që disa shërbime të kalojnë pranë tyre.
“Dhomat e Tregtisë kanë mundësinë të kenë shërbime për sa i përket dhënies së licencave. Në lidhej me atakarnetin, të marrin shërbimin e atakarnetiti, një shërbim i përkohshëm që biznesi e merr në momentin që ofron një shërbim jashtë kufijve të Shqipërisë. Dhënien e certifikatave të origjinës, po pse jo dhe euro 1, që në ‘94 – ‘95 Dhomat e Tregtisë e kanë patur dhe u është kaluar doganave, kur sot Dhomat Rajonale e kanë ata kompetencë për të dhënë euro 1. Kështu, ne do të shkurtonim edhe pengesat e procedurave që biznesi has pranë doganave në momentin e marrjes së këtij shërbimi në pikat doganore. Marrjen e shërbimit të regjistrimit të markave dhe patentave, marrjen e një shërbimi tjetër që është shumë mirë, edhe bar-kodet. Ndërmjetësimi po, unë e shikoj si një mundësi.”
Gjatë vitit të fundit qeveria ka ndërmarrë dhe reformën e derregulimit, çka ka reduktuar mjaft procedura si dhe mundësimin e marrjes së shumë dokumentave online. Kjo ka bërë që përveç uljes së kostove të kursehet dhe mjaft kohë për sipërmarrjen.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.