Leja për akuakulturë, vetëm në zona të veçanta – Projektvendimi/ Ministria e Bujqësisë identifikon 18 zona për peshq dhe molusqe
Dhënia e të drejtës së zhvillimit të akuakulturës dhe qirave të reja për këtë aktivitet do të bëhet vetëm për zonat e përcaktuara nga Ministria e Bujqësisë dhe Zhvillimit Rural. Përmes një projektvendimi të nxjerrë për konsultim publik, ky dikaster ka përcaktuar zonat e zhvillimit të akuakulturës përgjatë pjesës bregdetare, duke i grupuar në katër nën-zona të mëdha e më konkretisht: Shëngjini, Durrësi, Vlora dhe Saranda.
Zonat e përcaktuara për akuakulturë përfshijnë kategorinë e peshqve dhe molusqeve, ndërkohë që sipas relacionit që shoqëron projektligjin, këto zona janë thelbësore për të pasur një kornizë rregullatore dhe administrative kushtuar akuakulturës, për të siguruar një zhvillim të shëndoshë dhe të qëndrueshëm të sektorit. Për kategorinë e peshqve janë identifikuar në total 11 zona me një shtrirje totale prej 117.816 km2, dhe një prodhim potencial total vjetor të vlerësuar në 63,649 ton peshk, bazuar në kapacitetin mbajtës.
Ndërsa për kategorinë e molusqeve janë identifikuar gjithsej 7 zona me një shtrirje totale prej 108.791 km2. Sipas relacionit shoqërues, në terma ekonomike, vlera e prodhimit te prodhuesi vetëm për akuakulturën e kategorisë së peshqeve llogaritet në rreth 250 – 300 milion €/vit. Sipas të dhënave zyrtare, aktualisht, sektori i akuakulturës në Shqipëri gjeneron rreth 600 vende pune të drejtpërdrejta, duke përfshirë punën me kohë të plotë dhe të pjesshme, si dhe të gjitha punësimet indirekte në aktivitetet ndihmëse ekonomike përgjatë zinxhirit të vlerës (p.sh. përpunimi, shpërndarja, shitja me pakicë, paketimi, pajisjet, industria e ushqimit, shërbimi ushqimor, turizmi, etj.). Ndërkohë që, bazuar edhe në potencialin që ofrohet në zonat bregdetare një zgjerim i sektorit do të gjeneronte punësim të mëtejshëm direkt dhe indirekt në të gjithë zinxhirin e vlerës.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.