Leje drejtimi për automjetet – Testi pritet që në 2019 të jetë tërësisht elektronik
Shumë shpejt provimet me shkrim për patentë shofer do të realizohen në mënyrë elektronike.
Kjo për shkak të projektit “e-testimit” të nënshkruar mes Ministrisë së Infrastrukturës dhe kompanisë “PBC” gjatë vitit të kaluar.
Kurse tash është gati faza e parë e pilot projektit e cila do të fillojë tash për tash vetëm në qendrën e testimit në Prishtinë.
Kështu kanë thënë për Indeksonline, zyrtarët për informimin pranë Ministrisë së Infrastrukturës, të cilët kanë potencuar që kjo mënyrë testimi do të përdoret fillimisht, vetëm në njërën nga klasat e testimit në Prishtinë.
“Faza testuese do të filloj vetëm në një qendër të testimit dhe atë vlerësimet tona fillestare janë të fillohet në Prishtinë, në njërën klasë pasi që NJRPSH ka dy klasa ku organizohet provimi nga pjesa teorike, ashtu që për çdo eventualitet të kemi në dispozicion organizmin me shkrim të provimit dhe të jetë afër për intervenim në sanimin e problemit. Kjo do të vazhdoi deri sa të sigurohemi se e-testimi është 100% i gatshëm për implementim në të gjitha qendrat dhe garanton siguri të plotë në testimin e kandidatëve ( eliminohen të gjitha mundësitë e manipulimin eventuale)”, thuhet në përgjigjen e Ministrisë së Infrastrukturës.
Ky projekt, duket se nuk do të shkaktoi ndonjë dëm në zhvillimin e provimit për patentë shofer, pasi që janë marrë të gjitha masat. Kurse sipas Ministrisë së Infrastrukturës, ata janë gati për të bashkëpunuar me të gjithë aktorët, si Qendrat e Testimit dhe po ashtu Ministrinë e Punëve të Brendshme.
Sipas Ministrisë së Infrastrukturës do të bashkëpunohet edhe me auto-shkollat për tu pajisur me këtë souftuer, në mënyrë që kandidatët të familjarizohen me këtë mënyrë testimi. Ndryshe, ky projekt pritet të implementohet në tërësi gjatë vitit 2019 në qendrat e testimit në tërë Kosovën.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.