Lejet e ndërtimit dyfishohen në tremujorin e parë të vitit

Numri i lejeve të ndërtimit u rrit me ritme të shpejta edhe në tremujorin e parë të këtij viti. Sipas të dhënave nga Instituti i Statistikave, gjatë tre muajve u dhanë 221 leje ndërtimi, në rritje me 119% krahasuar me të njëjtën periudhë të një viti më parë.

Vitin e kaluar, numri i lejeve të ndërtimit ishte rritur me 80% krahasuar me vitin 2016. Prej më shumë se dy vjetësh, lejet e ndërtimit po rriten me ritme të shpejta. Kjo kohë përkon afërsisht me heqjen e moratoriumit për dhënien e lejeve të reja dhe me aplikimin e sistemit të lejeve online.

Bllokimi për shkak të moratoriumit, por edhe përmirësimi gradual i ekonomisë kanë shtuar nevojën për ndërtime të reja. Lejet e ndërtimit këtë vit janë më pak të përqendruara në ndërtime rezidenciale.

Sipas Instat, lejet e miratuara për ndërtesa banimi zinin 57% të numrit total të lejeve, nga 75% që ishte pesha e tyre në të njëjtin tremujor të një viti më parë.

Gjatë tremujorit të parë, rreth 43% e lejeve të reja të ndërtimit u dhanë për ndërtime tregtare dhe industriale, çka dëshmon edhe vazhdimësinë e investimeve të larta të biznesit në pasuri të paluajtshme.

Megjithatë, në vlerën e llogaritur sipas lejeve, në tremujorin e parë të këtij viti ka një rënie të lehtë krahasuar me një vit më parë. Vlera e përafërt e ndërtimeve për të cilat është miratuar leje është rreth 10.2 miliardë lekë, nga 11.1 miliardë lekë që kishte qenë në tremujorin e parë të vitit të kaluar.

Qarqet me numrin më të lartë të ndërtimeve të reja në tremujorin e parë ishin Tirana dhe Fieri. Në Tiranë u dhanë 65 leje të reja ndërtimi ose afro 30% e totalit.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.